Nomawi ni loin England zawk an haw!

'It's coming home" tih hla nen England fan-te hlimin lam mah se World Cup nomawi meuh chawi tur chuan kum li dang an thlir leh phawt a ngai ta.

Nilaini zan khan Croatia chuan World Cup semifinal-ah 2-1 in England an hneh a, Three Lions-in kum 1966 hnua nomawi chawi an beiseina chu a thamral ta.

England tan Kieran Trippier chuan freekick hmangin goal hmahruai khung mah se second half-ah Croatia tan Ivan Perisic-a'n an si phurh a sut a, extra time khelh a ngaih phah.

Team pahnihin penalty hmanga chak zawk zawn an mamawh mai dawn nia a lan hnu, minute 109-naah Mario Mandzukic chuan Croatia tan chakna goal a khung a, an ram chanchina a vawi khat nan World Cup final an lut.

Pathianni zan dar 8:30-ah World Cup final khelh a ni ang a, Croatia hian France an hmachhawn ang. England erawhin final khelh hun a thlen meuh chuan an in lum an thleng tawh ang.

Hei le England!

Inkhel ṭan aṭanga minute ngana lekah England fan-ten an beisei, an beisei ngam si loh an hmu nghal a, Kieran Trippier chuan yard 20 vela hla aṭangin mawi zetin freekick a pet lut.

England fans an lam a, Croatia an inring hman lo a, an hawihai. England-in inkhel an thunun chhunzawm a, tlarhmaah Raheem Sterling leh Harry Kane kan hmu fo a, goal hlauhawm tia sawi tur erawh an nei tam lo.

Chawlhlawk hman a nih hnuah England aiin Croatia an taima zawk a, an khel ṭha zawk bawk. Minute 68-naah Perisic-a'n si phurh sutna goal a khung ta nge nge a, Italian winger goal khung danah Kyle Walker chu dem theih a ni.

Goal an chhuah hnuah Three Lions an harh phah lo a, team hlauhawm zawk chu Croatia bawk an ni. Perisic-a'n si phurh sutna goal a khung hnu lawkah post a pet per a, minute 90-na hamrik a rik ruala lawm zawk chu England fans an ni.

England an thamral

Croatia-in semifinal lut turin last 16 leh quarterfinal-ah penalty shootout an mamawh ve ve a, knockout round chinah minute 240 an inkhel a, penalty vangin rilru an seng nasa a, England chu chance nei zawkah ngaih an ni.

Inkhel chawhma lama lang mang lo Luka Modric a langsar ṭan a, khel tam lo zawk England an chau zawk niin a lang. Kane hmuh tur a awm mang lo a, Dele Alli leh Jesse Lingard te an zuih ral a, Raheem Sterling aia luhtir Marcus Rashford pawh eng ruai a ni lo.

England tana langsar ber chu Jordan Pickford a ni a, Everton goalkeeper hian Mandzukic goal khung ngei tur nia ngaih chu ṭha zetin a dan sak. Minute 109-naah erawh Juventus striker hi a dang nawn lo.

Walker-a ball petchhuah sual chu Perisic-a'n a tauh let a, John Stones inring hman lo karah Mandzukic a dawk zawk a, Pickford dan hman lohin a khung. England-in bei let turin tha an nei tawh lo a, Croatia an chak.

Mangṭha England

England-in first half-ah hma takah goal hmahruai an khung a, Croatia beiseina tudai tur hun duhawm dang an nei bawk. Mahse, he England team hian beisei ang game an phochhuah chhunzawm thei lo a, chu chu an tuar ta niin a lang.

Sweden laka khel ṭha Alli leh Lingard ten beisei an phak lo a, Jordan Henderson-a'n ball pass sual a nei fo a, an goal chhuah pahnihah tlarhnung puh ve ve theih a ni bawk. Harry Kane-a'n World Cup final lut tur meuh chuan captain hna a la tlin tawk lo niin a lang a, Spurs striker khelh danah a ṭhiante entawn tur paukhauhna leh tih 'hram hramna' hmuh tur a awm lo.

England vanduaina belhchhah turin Gareth Southgate-a substitution siamin awmzia a nei lo. Tlarhmaah Rashford-a'n eng teh ual a ang lo a, goal an chhuah hnuah Croatia goal nawr turin Jamie Vardy luhtir ni mah se Leicester City striker hmuh tur a awm lo.

Eric Dier-a'n Henderson aia a tih

ṭhat zawkna sawi tur a awm lo a, hei mai a ni lo, si phurh sut an mamawh laiin Trippier chu hliam vangin lakchhuah a ngai a, Three Lions-in substitution an neih an hman zawh tawh bawk si avangin kim lo chungin hun tawp an khar.

Mahse, hlim rawh u!

England-in final inpetkai thei lo mah se England fan-te inhnemna tur chu, "Mahse, hlim ang u," tih hi a ni–Russia an pan hma khan Three Lions lakah beiseina a sang lo a, England fan-ten beisei em em nei loa World Cup an pan ṭum ang hialin an sawi!

Mahse, beisei loh karah England fan-ten hlimna tur an nei a, Golden Generation tia hminglem an pek Steven Gerrard, Frank Lampard, Paul Scholes, Rio Ferdinand leh Wayne Rooney te awmnain an tih theih loh major tournament-ah semifinal an lut.

England tan a bik takin tournament

ṭan tirha beisei san lohna Jordan Pickford, Harry Maguire leh Kieran Trippier ten player ṭha an ni tih an pholang a, Southgate an thlak thut a nih ngawt loh chuan Three Lions player rinrawl an nih chhunzawm zel a beiseiawm.

A eng zawnga thlir chuan England team an la naupang tlang a, captain Kane meuh pawh kum 24 mi bak a la ni lo. Major tournament-ah semifinal tawnhriat meuh an neih tawh avangin an rilru a huaisen sawt ang a, England hian an hma hunah nomawi an beisei a nih pawhin a mak lo ang.