MPL club an danglam

Lalbiakliana Memorial MFA Super Cup-ah Mizoram Premier League club-te an che ṭha zel a, nimin khan Aizawl FC, Ramhlun North FC leh Mizoram Police ten quarterfinal an lut. MPL club pathum bakah hian Aizawl FC Academy chu a sang pariat zingah an invawrh kai ve bawk.

Vawiin hian inelna chhunzawm a ni dawn. Rajiv Gandhi Stadium-ah champion lai Chhinga Vengin an veng ṭhenawm club thar Armed Veng chu chawhma dar 11:30-ah an hmachhawn ang a, Kanan Veng FC leh J&S Memorial FC te an inkhel bawk ang.

Lammualah Chanmari FC leh LKS Hnahlan FC te an inkhel ang a, Bungkawn leh FC Zokhawthar te an inkhel bawk dawn.

AFC an chungnung

Aizawl FC Academy-in East Lungdar 1911 FC chu 4-3 in an hneh. Inkhel hmuhnawm takah AFC Academy-in goal liin hma hruai mah se Aizawl khaw pawn club an ṭhanharh a, goal thumin an chhanglet a, penalty shootout hruai thleng turin goal khat chiah mamawh mah se an khung belh thei tawh lo.

Aizawl FC senior team-in MPL-a an awm pui Bethlehem Vengthlang FC hneh turin harsatna an tawk lo a, 5-0 in an chak. MPL club dang Ramhlun North FC leh Mizoram Police FC ten Zawlnuan FC (3-1) leh Phulpui GSA (6-2) in an hneh ve bawk.