FIFA World Cup leh chawimawina hrang hrang

Khawvela football inelna ngaihhlut ber FIFA World Cup-ah hian mimal lawmman hrang hrang a awm a, chungte chu Golden Ball Award, Golden Boot Award, Golden Glove Award leh Best Young Player Award te an ni a, heng bakah hian Fair Play Award a la awm bawk.

Golden Boot hi chu goal khung tam ber hnena pek tur a nih avangin thlan buai a ngai lo a, a bakah zawng chuan Technical Study Group chu thutlukna siamtu tur an ni.

Best Player

Player ṭha ber hnenah Golden Ball Award pek an ni a, a ṭha pahnihna leh pathumna hnenah Silver Ball leh Bronze Ball pek an ni bawk. He chawimawina hi FIFA chuan official-in kum 1982 aṭangin a pe ṭan a, Italy forward Paolo Rossi chu a dawng hmasa ber a ni.

World Cup hnuhnung berah khan Argentina final thlenpuitu Lionel Messi chuan a dawng a, tun ṭumah hian Croatia captain Luka Modric te bakah France lamah Antoine Griezmann leh Kylian Mbappe te hming a langsar a. Chutihrualin a thlangtu tur Technical Study Group lamin ngaihdan dang an nei thei bawk.

Top Scorer

Goal khung tam ber hnenah Golden Boot Award pek a ni dawn a, Silver Boot leh Bronze Boot dawng tur a awm bawk. An goal khung zat a inang a nih chuan assists ngah chu dah san tur a ni a, chutah pawh an la intluk a nih chuan minute khel tlem zawk chu dah san tur a ni. Tun dinhmunah goal ruk khung tawhtu Harry Kane a dinhmun a ṭha hle.

Best Goalkeeper

Golden Glove Award hi best goalkeeper hnenah pek a ni a, he chawimawina hi 1994

aṭanga ṭan niin kum 2006 thleng khan Yashin Award tih a ni a. Goalkeeper ṭha Iker Casillas, Oliver Kahn leh Gianluigi Buffon te chu he chawimawina dawng tawh zingah hian an tel a ni.

Tun ṭumah hian ṭum hnih ngawt penalty shootout-a Croatia chhan­him tawhtu Mona­co Danijel Subasic leh France captain Hugo Lloris te chu dawng turin an la khan hle.

Best Young Player

Best Young Player Award hi kum 2006 aṭang khan tih ṭan a ni a, Germany forward Lukas Podolski chu a dawng hmasa ber a ni a. Kum li hnuah pawh Ger­many player tho Thomas Muller-a'n a dawng ve leh a, French midfielder Paul Pogba chuan inelna hnuhnung berah a dawng.

Tun ṭumah pawh hian French player bawkin an dawn a rinawm a, kum 19 mi lek ni chunga goal thum khung tawh PSG forward Mbappe-a elpha an awm lo niin a lang. Lawmman dawng thei chin hi January 1, 1997-a piang chin an ni a, finalist pakhat zawk Croatia lamah dawng thei tur an nei lo.

France lamah Mbappe bakah Ousmane Dembele te chu kum aṭanga ena dawng thei tur zinga mi an ni a, amaherawhchu an khelh dan thlirin dawng thei tur zinga mi Brazil forward Gabriel Jesus, England forward Marcus Rashford leh Uruguay midfielder Rodrigo Bentancur te pawhin PSG forward Mbappe hi chu an tluk lo.

Fair Play Award

Fair Play Award-ah hian player leh official ten fair play medal an dawng vek a, hei bakah hian voucher an dawng bawk. Voucher-ah hian naupang football hma­sawnna atana hman tur US dollar 50,000 man hu football bungrua an dawng bawk a, India pawisa chuan cheng nuai 35 bawr vel a ni.

Fair Play-ah hian tehfung hrang hrang a awm a, chungte chu rilru put hmang dik, an khelh dan hmanga attacking game khel, an khingpuite zah thiam, match official chunga an chet dan, team official chet dan leh an supporter-te chet dan te chu a ni a; heta an point hmuh hi an card hmuh dan aṭangin an la paih leh bawk dawn a ni.