Roreltu Roger a liam

Wimbledon quarterfinal en tura No 1 Court ṭhutna ticket latu fans 11,393 ten Roger Federer hnehna chang lai hmuh an tum a, mahse Swiss star hi hneh theih ve tho a nih avangin darkar li leh minute 14 an inkhelh hnua Kevin Anderson chak lai an hmu thung–champion lai Federer tan Wimbledon 2018 semifinal-ah hmun a awm ve ta lo.

Ningani zan All England Club-a inkhelah seeded pakhatna Federer hi seeded pariatna Anderson lakah 2-6, 6-7(5), 7-5, 6-4, 13-11 in an chak lo a, grass court inelna liana singles champion hnem ber Martina Navratilova (9 titles) record nih rual a tumna chu a thamral. Anderson erawh South African mipa zinga Kevin Curren (1983) hnua semifinal lut leh thei hmasa ber a ni thung.

Roger a liam

Wimbledon vawi riat champion tawh Roger Federer hian a nomawi kawl lai humhim a duh vangin clay court season pawh a hmang duh lo a, quarterfinal an khelh hma thleng kha chuan set a hloh miah loh bakah a service chhuhsak thei an awm lo!

Grand Slam nomawi 20 zet nei tawh Federer-a'n a match hmasa lamah Dusan Lajovic, Lukas Lacko, Jan-Lennard Struff leh Adrian Mannarino te a sawp vek a, thla leh maia kum 37 tling tawh tur hian player pali hneh tur hian court chhungah darkar ruk chuang hret bak hun a mamawh lo a ni.

Anderson lakah pawh Federer hi rinkai niin, set hmasa pahnih awlsam rakin a la a, set thumna game hmasa pathum a lak leh hnuah phei chuan semifinal lut tur zawk a chiangah a ngaih theih. Mahse, inkhel a la zo bik lo–pakhat tana thawnthu lungchhiat thlak leh pakhat zawk tana chanchin lawmawm inṭanna a ni zawk.

Feet 6 leh 8 inch zeta sang Anderson chu thi tawha ngaih ni mah se Federer-a service chhuh mauh mai. Tie break khelh zui ngai khawpin an inkhel tawk chho a, tawnhriat ngah zawk Federer meuh pawhin match point a hmuh a chhawr ṭangkai theih loh avangin set nga an khelh chhunzawm a ngai.

Set hnuhnung berah pawh Federer-a'n 4-3 a nih laiin break point a hmu a, chhawr ṭangkai thei ni se chuan a service la zui lehin hnehna a chang a ni mai tur. Mahse, nidang angin thil a kal fuh thei bik lo, 11-11 a nih hnuah Federer-a'n a vawi khat nana double faults neiin, Anderson zawk bawkin a service chhuhsak lehin hnehna chan nan a service a hum zui leh ta bawk a ni.

Aces chu

Kevin Anderson hi palian tak niin a ball vuak a na hle, tunlai mipa player service ni ṭha berte zinga mi a ni. Federer lakah pawh aces vawi 28 ngawt a vaw chhuak thei a, service nei ṭha Federer ai pawhin vawi 12 zetin a nei hnem–an inthlauhna hi player ṭhen khatin match khata aces an siam zat zet a tling; hei hi a chakna hnar pawimawh pakhat a ni.

Kum 32 mi Anderson hian forehand nei ṭha hmingthang Federer-a ball vuak dawnsawn dan a thiam a, a innghahna ber chu a service ni mah se a khingpui ball vuak na leh vir tak a vuak let theih zel avangin a chak hi a mak lo. A zawna set 35 ngawt la a record thar siamtu Federer meuh a hneh theih miau avangin a thiam pali zinga tel hi a phu.

2017 US Open finalist Anderson hian semifinal-ah chuan amah ang bawka service nei ṭha John Isner a hmachhawn leh ang. Isner hian Milos Raonic lakah aces vawi 25 a vuak chhuah hnuah 6-7 (5), 7-6 (7), 6-4, 6-3 in hnehna a chang a, player pahnih tan Wimbledon semifinal vawi khat khelhna tur a ni ang.