Nadal hmaah Djokovic

Rafael Nadal lakah Juan Martin del Potro-a'n vawi 33 tehmeuh mai aces vaw chhuak mah se hnehna chan nan a tawk zo lo a, Centre Court-a darkar li leh minute 47 zet an inkhelh hnuah world number 1 Nadal zawkin 7-5, 6-7 (7-9), 4-6, 6-4, 6-4 in hnehna a chang.

Ningani zan Wimbledon quarterfinal inkhel pakhat zawkah Grand Slam vawi 12 champion tawh Novak Djokovic chuan, 6-3, 3-6, 6-2, 6-2 in Kei Nishikori a hneh ve bawk. Djokovic leh Nadal te hi final luh inchuhin zaninah an inkhel zui leh dawn.

Player pahnihte hi vawi 51 an intawng tawh a, record nei ṭha zawk Djokovic-a'n vawi 26 hnehna a chang tawh. 2018 Italian Open semifinal kha an intawn hnuhnun ber niin, kum khat hnua an inkhelhna hmasa ber ni bawkah hian Nadal-a'n hnehna a chang thung.

Nadal thahrui

Grand Slam vawi 17 champion tawh Nadal hi kum 32 mi a ni tawh nachungin a rualpuite lakah thahrui a la ngah a, inkhel inhnehtawk takah set thum an khelh zawh hnua set hnuhnung pahnih an khelh laiin a chungnun phah hle.

French Open champion hlim Nadal hian vawi hnih a champion tawhna All England Club-ah 2011 hnua a vawi khat nan semifinal a lut leh chiah a, a elpui ber Roger Federer nen kum 10 hnuah Wimbledon title inchuh an tumna erawh a thleng dik thei dawn ta lo.

Nadal chuan, "Entu lam tan pawha inkhel hnuhnawm a tlin ngei ka ring, player pahnih ten kan theihna zawng zawng kan hmang a, a nihna takah chuan Juan Martin zawk pawh kha chak ni se a mak lo ang," tiin vanneih vang chak zawk a nih thu a sawi. French Open hnuah Nadal hi inbuatsaihna tournament khel loin Wimbledon-ah hian a inlan.

Novak a dam

Kiu hliam vanga season khat chhung deuh tawh a buai hnuah Novak Djokovic chuan a ṭhat dan berin a khel chhuak chho leh tawh a, Serbian tlangval hian a vawi 32 nan Grand Slam semifinal a khel dawn.

Djokovic hian service nei ṭha tak Kyle Edmund leh Karen Khachanov te a paltlang hnuah, player fei tak mai Nishikori hmaah harsa taka chak hram tura ngaih ni mah se awlsam angreng takin a tlang.

Kum 31 mi Djokovic hi hliam vanga result a neih ṭhat loh lai khan ranking lamah a sang 20 zingah a tel phak lo hman a, tunah pawh seeded 12-na a ni phak chauh. June thla tawp khan Queen's Club Championship-ah final a thlen theih avangin Wimbledon semifinal a thleng chho zui thei hi a mak lo.