Ka thinlungin Croatia a hmangaih si (Rakitic-a'n a pianna Switzerland aia Croatia tana khelh a thlan dan chanchin)

Kum 1991-a Croatia-in Yugoslavia laka zalenna a sual khan ka chhungten Croatia hi an chhuahsan a, an let tawh lo. Kei leh ka unaupa Dejan te hi Switzerland-a piang kan ni a, kan inah chuan Croatian ṭawng kan hmang a, kan chenna Rheinfelden-ah chuan Croatian an tam hle.

Kan la naupan avangin Balkans-a thil thleng hi kan hrethiam ve chiah a, ka nu leh pate pawhin indo chanchin min hrilh hre duh lo. Chutihrualin phone-a kan chhungte an thih thu an rawn hrilh hi chuan an ṭap fo thung. Thil thlen dan chu TV kaltlangin video leh thlalak te kan hmu a, thil thlen dan chu a mak a, 'mangchhia' tiin sawifiah ila a chiang ber awm e.

Croatia chu la hmu lo mah ila kan thinlungah erawhin helai hmun hi 'home' tiin a chhal thung. Ka pa hi football khel ṭhin a ni a, Bosnia-ah phei chuan football level sang tak khel ṭhin a ni a, Barcelona tana ka khelh hnu pawhin a ni aia football atchilh hi ka hre lo.

Kum 1992 aṭangin kan ramin team kan nei ṭan a, kum ruk hnuah World Cup khelin Germany nen quarterfinal an khel hial a. He inkhel hi kan thlir a, minute 90 chhung hi ṭawng phalsak kan ni lo a, inkhel entawp tur a ni.

Croatia-in Germany an hneh phei kha chuan mumang ramah kan cheng a ni ber a, ani tan chuan football leh Croatia hi a hlu a ni. Hei hian keimahniah pawh nasa takin thu a sawi.

Ṭum khat chu Croatia aṭangin thilpek kan dawng a, ka pa chuan ka unaupa nena kan ta tur Croatia jersey a var leh sen ṭial chu a rawn phawrh a. Keini chuan kan ngai hlu hle, kan thil tihna apiangah kan ha a ni ber a, kan phelh pha lo.

Amaherawhchu, ka inkhelh ṭan hnuah erawh ka pianna Switzerland tan ka khel hmasa zawk a, mi dang bulah pawh Swiss mi ka ni ṭhin a, Swiss ni chunga Ivan Rakitic nih daih chu a mak hle. Mahse, Switzerland-ah ka piang a, helai hmunah hian ka sei lian a, ka

ṭhiante pawh helai hmuna mi hi a ni a. Chuvangin Switzerland tana kum nga chhung youth team-a ka khel thei hi ka inchhung hle a ni.

Switzerland tana ka khelh lai zawng pawh hian ka thinlung chuan Croatia a hmangaih si. Basel-ah Slaven Bilic leh Croatian football federation president-in ka inkhel an rawn en a, min kawm zui bawk. Room khata ka mi ngaihsan Slaven nena awm ho chiah chuan, i hnung zui ka duh tih nghal mai ka duh a, a rem chiah bik lo.

Basel aṭanga German club Schalke ka zawm dawn takah chuan rilru thawl taka bul ṭan ka duh a, chuvangin ram tana ka khelhna tihchian ka duh. Ka rilru a insual nasa a, a tawpah chuan thinlungin a hmangaih lam chu ka awn ta.

A hmasain Swiss coach chu biak hmasak ka duh a, hetih lai hian ka pa chu room pawnah ka thutlukna hre châkin a lo tei sek tih ka hre thei a. Tichuan Swiss coach ka biak fel hnu chuan Slaven bulah chuan Croatia team tana khelh ka duh thu ka hrilh bawk.

Ka pa chuan thutlukna ka siam hma hian ka duhthlanaah a dah a, engtin pawhin thutlukna siam ila min ṭan tlat tur thu a sawi. Tichuan, ka pa bulah chuan fiam hram a. Switzerland tana khelh zel ka tum thu ka hrilh phawt a, 'A pawi lo' tiin min chhang.

Tah chuan ka nui a, Croatia tana khelh ka thlan thu ka sawi a, a insum zo ta lo. Ka pa biangah chuan lawmna mittui chu a luang a, a ṭap zui nghal a. Tun thlengin Croatia tana ka khelh hi chuan ka pa hi ka hre chhuak ṭhin. Croatian mipui ang thoin ka pa duhthusam ka tihhlawhtling a, ram tana inkhel tura mahni ram kawr ngei han hak hlut zia hi thuin a sawifiah pha lo a ni.