Chelsea - Conte Out; Sarri In?

Napoli president Aurelio de Laurentiis chuan an coach Maurizio Sarri chuan an club a chhuahsan hnaih tawh thu a sawi a, "Sarri leh Chelsea kutah engkim a awm tawh," a ti.

Sarri hian Serie A club-ah hian contract la nei mah se Napoli hian an coach thar tura Carlo Ancelotti an lakluh thu an puang tawh a, Sarri a chhuak dawn tih a chianna a rei tawh.

Aurelio de Laurentiis chuan, "Sarri nena kan indawrna chu a tawp hnai tawh a, engkim hi amah leh Chelsea chunga innghat a ni tawh a ni," a ti a, Antonio Conte dinhmun a him lo nghal.

Khawiah nge Conte?

Conte-a'n Chelsea pre-sea­son training a zawm avang­in a chhuak dawn lo nia sawi a awm hman a, mahse Chelsea nena sawizawm Sarri chungchangah Napoli lamin thuthar an neih avangin Conte hi a chhuak ngei dawn niin a lang.

Kum 48 mi manager hian Stamford Bridge-ah kum khat atan contract a la nei a, a contract hi a hmang zo lo a nih chuan Blues lam hian pound maktaduai kua an pek a ngai ang.

Conte hian hna dang a thawk nghal a nih erawh chuan a sum dawn tur hi la tih hniam ve leh theih tho a ni a, chutihrual chuan a tira sawi rik awm Arsenal, Paris Saint-Germain leh Italy ten coach thar an nei vek tawh a, Conte 'class' mil hnaruak a awm rih lo.

Chelsea-ah Jorginho?

Sarri-a'n Chelsea a pan tur thu sawi rik a nih rualin Na­­poli-a a enkawl midfielder Jorginho lakluh tumin Blues chuan Italian club hi an dawr nia sawi a awm nghal.

Kum 26 mi midfielder hi Manchester City nen sawizawm an ni a, Pep Guardiola chuan pound maktaduai 50-a lakluh a duh. Mahse, Napoli president chuan a player hian Chelsea pan a duh thu a sawi.

Napoli hotupa Aurelio chuan, "City nen inremna nei tawh mah ila Jorginho hian Lon­don-a kal a duh zawk thu min hrilh a, City hian min hriatthiam a ngai dawn a ni," a ti a, Chelsea a pan hmel ta hle.