Sindhu leh Prannoy an chak

Thailand Open BWF World Tour Super 500 tour­nament khelh mekah PV Sindhu leh HS Prannoy te chuan Nilaini zan khan hmei­chhia leh mipa singles last 16 an inhlangkai.

Bangkok-a inkhelah Olympic silver medallist Sin­dhu hian Bulgarian nula Linda Zetchiri chu 21-8, 21-15 in a hneh a, a match lehpekah Hong Kong shuttler Yip Pui Yin nen an inkhel leh ang.

Mipa singles lamah a ke rek hliam dam hlim Prannoy chuan Spainish shuttler Pablo Abian chu 21-16, 21-19 in a hneh ve bawk. Seeded palina Prannoy hian Sony Dwi Kuncoro a hmachhawn ve leh thung dawn a ni.

2014 Commonwealth Games champion Parupalli Kashyap pawhin Jason Anthony Ho-Shue lakah 21-15, 21-17 in hnehna a chang ve bawk a, Indian shuttler hmachhawn leh tur hi Japanese tlangval Kanta Tsuneyama a nih avangin a awlsam tawh lo ang.

Mipa doubles pair Manu Attri leh B Sumeeth Reddy ten hnehna an chang bawk a, Swiss Open champion Sameer Verma leh Vaishnavi Reddy Jakka te erawh an match hmasa berah hnehna chang zo loin an zinkawng a tawp nghal a ni.