Mizoramin a vawi khat nan semifinal an lut ; Senior Women's National Football Championships

Hero Senior Women's National Football Cham-pionships-ah Mizoram chuan nimin khan Maharashtra 4-1 a hnehin semifinal an lut.

Ram puma hmeichhe football thiam ber zawnnaah hian Mizoram hmeichhe team hian group stage an la pel ngai lo a, an thlen chin apiang hi record a ni zel.

Mizoram hian semifinal-ah Goa hnehtu Railways an tum dawn a, December 7, Thawhlehniah an inkhel ang. Railways hian Goa 4-2 in an hneh a, Gupriya Routray-i'n hattrick a siam.

Mizoram an ṭha
EMS Corporation Stadium, Kozhikode-ah Mizoramin bul an ṭan ṭha a, minute 10-na lekah Grace Lalrampari ball pek chu Kolasib nula Elizabeth Vanlalmawii'n um lutin goal hmahruai a khung.

Mizoram an khel ṭha zui a, group stage-a goal hnih khungtu Bukpui nula Miriam Lalnunsiami'n ding lam aṭanga lalutin minute 24-naah goal mawi bik a khung.

Maharashtra-in referee duhsakna dawngin âwm lo takah penalty hmu mah se goal zawnah an pet lo. Second half-ah Maharashtra an insiam ṭha a; Mizoram keeper K. Lalhruaizeli'n freekick a man per avangin Maharashtra forward Karen Pais-i'n a per chu si phurh sut ṭhen nan a hmang.

Goal khat vangin Mizoram an buai lo a, minute 66-naah Grace-i ball vawrh luh ṭha chu Elizabeth-i'n goal-ah petin keeper Anjali-i'n dansak mah se Miriam-i'n a per rawn nang hmasa berin Mizoram goal thumna a khung.

Minute 87-naah Miriam-i'n keeper Anjali a bum a, keeper hian Mizoram forward hi ti tlu mah se ball per hi Elizabeth-i'n goal ruakah a khung.

Boruak a ṭha
Mizoram team boruak a ṭha tih a lang a, goal an khungin a hu hoin goal khung an lawm a, an thawhhona ṭhatzia a lang.

Mizoram coach F. Lalrozara chuan, "Group khat aṭanga a ṭha ber vek kan nih tawh avangin inkhelh awlsawm a ni lo a, chuti chunga kan player-ten kan game duh dan tak an khel tlat ṭhin hian min tilawm. Pressure na takah pawh ground ball hmang thei tura rilru fim kan pu tlat ṭhin hi a lawmawm a, kan chakna pakhat pawh a ni," tiin Vanglaini a hrilh.

Mizoram assistant coach Lalrindika Hmar chuan, "Maharashtra lam khan offside trap an siam nasa tih kha rei lo te aṭang khan kan hre nghal a, khalaia ball rawlh luh kha kan tan chance tha tak a ni dawn tih kan man nghal.

"Vawi tam offside mah ila, kan thil duh kan naute’n an ti thei tlat kha khan dinhmun ṭhaah min dah a ni. Mizo mipuite Pathian hnenah lawmthu min lo sawipui turin kan ngen che u a, semi final-ah team ṭha Railways kan hmachhawn dawn a, ṭawngṭaipui kan mamawh hle a ni," tiin ngenna a siam.

Quarter final inkhel dangah Manipur chuan 2-0 in Assam an hneh a, Tamilnadu 2-0 bawka hnehtu Odisha nen semi final pakhat zawkah an intum ang.