Der Klassiker-ah Bayern an vannei

Bundesliga-a inkhel ngaihven hlawh Der Klassiker-ah Bayern Munich-in Borussia Dortmund chu 3-2 in an hneh hram. Signal Iduna Park-a inkhelah Bavarians tan Robert Lewandowski-a'n goal hnih a khung.

Inrinni zan inkhelah goal nga a lut a, inkhel hmuhnawm bik a ni. Minute ngana lekah Julian Brandt-a'n Bayern tlarhnung bumin ṭha zetin goal hmahruai a khung.

Minute li hnuah Bayern-in Lewy hmangin an sut a, Polish striker class sanzia a lan rualin Dortmund defender Mats Hummels chetsual vanga goal lutah a ngaih theih.

Bayern-in Kingsley Coman hmangin minute 44-naah hma an hruai a, halftime-ah 2-1 a ni. Dortmund striker Erling Braut Haaland-a'n defender Dayot Upamecano tan harsatna a siam nasa a, minute 48-naah a phu angin goal a khung.

Team pahnih an innawr tawn a, tihsual a tam a, chance a tam bawk. Referee thutluknaah Bayern an vannei zawk a, Dortmund-in penalty awma ngaiha pek an nih loh laiin ball-in Hummels-a kut a fuh avangin penalty an chawi thung.

Tun dinhmuna khawvel striker ṭha bera chhal Lewy-a'n minute 77-naah penalty aṭangin chakna goal a khung a, chutihrualin hun tawp thlengin inkhel boruak a sang.

Donyell Malen leh Thomas Meunier te goal khung tur chu Bayern keeper Manuel Neuer-a'n a dansak ve ve. Dortmund-in siphurh sut tumin hun tawp dawn corner kick-ah keeper chawpin an chhuak vek a, Bayern-in nawr letna remchang neiin Corentin Tolisso-a'n goal ruakah a khung lo.

Inkhelh banah Dortmund midfielder Jude Bellingham chuan, "Germany-a inkhel boruak sang berah match fixing-a buai tawh referee kan nei a, eng vak nge kan beisei chuang ang. A thutlukna tam tak kha hriatthiam a har. Penalty turah ka ngai lo a, Hummels khan ball lak a tum a, ball-in a kut a per a ni," tiin referee Felix Zwayer a sawisel.

Zwayer hi kum 2005 khan German FA chuan match fixing buainaa inhnamhnawih avangin thla ruk chhung an hrem tawh. Dortmund captain Reus pawhin penalty pek a nih ve loh chu hriatthiam har a tih thu a sawi ve bawk.