BCCI Governing Council-ah Mamon Majumdar

India rama cricket thuneitu sang Board of Control for Cricket in India (BCCI) chuan Inrinni khan Kolkata-ah Annual General Meeting vawi 90-na a nei a. Cricket Association of Mizoram Honorary Secretary ni lai Mamon Majumdar chu Indian Premier League (IPL) governing council member atan an thlang.

CAM honorary secretary Mamon hi Governing Council member ni lai a ni a, term thar atan he nihna hi a chelh leh dawn. Governing council hi Indian Premier League enkawltu an ni a.

BCCI rorelna lianah hian India hmarchhak state ten cricket-ah hma an sawnna tura hmalakna lian tak ni tur chu kalpui tan tura pawm a ni. AGM hian India hmar chhak state cricket association ten hma an lakna tura sum an dawn tur chu season thar atang cheng vaibelchhe 12.5 ah tihpun a remti a. Cricket hmunhma sak nan cheng vaibelchhe 10 pek an ni bawk ang.

Mamon Majumdar hian BCCI secretary leh president te hnenah India hmarchhak state te aiawha lawmthu sawiin, "He hmalakna hian nasa takin cricket hmunhma ṭha kan neihna kawngah min pui dawn a, cricket hmasawnna tura pawimawh tak a ni ang. India hmarchhak aṭanga cricket player ten hma an sawn phah hle bawk ang," a ti.

Rorelna lianah hian Mizorama Suaka Cricket Ground-ah Indoor Practice na hmunhma sak chu pawm a ni a, India hmarchhak state dangteah pawh indoor practice facility hi sak vek tur a ni a, hemi hmalakna kaihruai tur hian Mamon Majumdar hi ruat a ni bawk.