ISL-ah Mizo hming a mawi

Inrinni zan ISL-ah match hnih a awm a, Mizo hming a mawi - Rochharzela'n NorthEast United tan goal pawimawh a khung a, FC Goa lakah 2-1 in a team a chakpui.

Highlander inlan zawhah Mumbai City-in 3-1 in Bengaluru an hneh a, Mumbai midfielder Lalengmawia (Apuia) chu hero of the match atan thlan a ni.

Zirtawpni zan khan Chennaiyin leh East Bengal chu 0-0 in an inhnehtawk bawk a, Chennai club tan Lallianzuala Chhangte leh Jerry Lalrinzuala ten minute 90 an khel tluan.

Ro hlu an chhar!
Inrinni zan an inkhelh hmain NorthEast-in tun season ISL-ah chak an la nei lo a, an thiampuipa Federico Gallego chu Chennaiyin laka a hliam avangin tun season tluan a inlan dawn lo tih an hre bawk.

Chanchin lawmawm loin NorthEast a bawm a, season hmasaa Khalid Jamil fak nasatu fans tam takin ISL-a Indian coach hmasa ber hi an sawisel hman leh tawh.

Mahse, Khalid-a'n Inrinni zanah ro hlu tak a chhar a, a hming chu Rochharzela a ni - Aizawl FC boss hlui hian tun season-a a vawi khat nan Chhinga Veng tlangval hi bul a ṭantir a, a chhanletna chu goal a ni.

Mizo tlangval
Inkhel ṭan aṭanga minute 10-na lekah Chhara'n goal hmahruai a khung a, mahse, goal a khung aṭanga minute thumna lekah Goa tan Alexander Jesuraj chuan si phurh a sut - Lalkhawpuimawia leh Mathias Coureur ten Highlander tan goal khungna remchang dang nei mah se an chhawr lo.

Mahse, hun pek belh minute thumnaah Khassa Camara erawh dan theih a ni lo a, goal ṭha bik khungin Highlander a chakpui - NorthEast tan Joe Zoherliana chu minute 17-na lekah luhtir a ni bawk a, Lengpui tlangval tan ISL-a a match hmasa ber a ni.

Chhara chuan, "Coaching staff-ten goal ka khung theih an rin thu min hrilh ṭhin a, minute tam zawk pek ka nih chuan goal khung hi ka inring sa hrim hrim. A pawimawh ber erawh Pathian zar a ni a, a malsawmna ka dawn vang liau liau a ni," tiin Vanglaini a hrilh.

Apuia a pui
Lalengmawia'n Indian football-ah a mikhual lo tih a pholan chhunzawm zel a, Bengaluru nen an inkhela Bangalore goal nawr tur tam tak dang chattu hi minute 80-naah lakchhuah ni mah se player langsar bera chhal ngam a ni.

Mumbai tan Igor Angulo chuan minute kuana lekah penalty hmangin goal hmahruai a khung a, mahse, Bengaluru-in Cleiton Silva freekick mawi bik hmangin si phurh an sut.

Mahse, Bengaluru captain Sunil Chhetri tan khua a var thei lo - tun season-a goal khung la nei lo striker hian penalty a hlah a, Mumbai-in Mourtada Fall leh Ygor Catatau hmanga goal an khung leh bawk si avangin 3-1 in Mumbai an chak.

December 3, Zirtawpni Zan
Chennaiyin FC 0 - 0 East Bengal

December 4, Inrinni Zan
NorthEast United 2 - 1 FC Goa
NOR: Rochharzela 10'; Khassa Camara 90+3'
FCG: Alexander Jesuraj 13'

Bengaluru 1 - 3 Mumbai City
BEN: Cleiton Silva 20'
MUM: Igor Angulo 9'; Mourtada Fall 54'; Ygor Catatau 85'

Zanin Inkhel Tur
Jamshedpur FC 7:30 PM ATK Mohun Bagan