Liverpool chhandamtu Origi ; City an chak
Premier League hmahruaitu Chelsea tlawm remchangah lain Liverpool leh Manchester City ten an khingpui ve ve an hneh a, Reds hian hun pek belha Divock Origi goal hmangin Wolverhampton Wanderers chu 1-0 in an hneh hram.
Liverpool-in hnehna an chan avangin league table chung ber an luah hman zuai a, mahse, tlangval tlatlum lo len chen bak an awm hman lo - City-in 3-1 a Watford hnehin hmahruaitu an ni.
Pep Guardiola enkawl team tan Bernardo Silva chuan goal hnih khungin Raheem Sterling-a'n goal khat a thawh bawk a, Cucho Hernandez chuan minute 74-naah Watford tan khung ve mah se awmzia a nei phak lo.
Inrinni zana inkhelh hmain Chelsea chu hmahruaitu an ni - mahse, club lian pathum an inlan zawh meuh chuan a chung berah City an awm a, Liverpool-in dawtin Chelsea chu pathumnaah an awm!
Origi time!
Liverpool tan Origi khel tam lo mah se a hunah tak goal a khung ṭhin avangin Kop tam takin 'legend' huang chhungah an dah a, a awm lo hran lo - Inrinni zanah pawh a hunah tak Belgian striker a inlar leh ta a, hun pek belh minute linaah chakna goal a khung!
Reds-in goal khungna chance nei lo an ni lo. Mahse, Wolves forward hlui Diogo Jota chuan hnai set sawt aṭangin a tauh goal lo a, goalkeeper a tlanpelh vek hnua goal line-a ding Conor Coady-a pet perte chu ho tak a ni.
Mohamed Salah-a'n awlsam taka a khung tur nia lang Romain Saiss-a'n a lo tackle hmante chu Wolves defending ṭhatzia pholangtu a ni a, Salah-a'n ṭha zeta Origi a pass hnua Belgian striker goal khung erawh an tan dan theih a ni lo.
Wolves erawh minute 90 chhung ṭha taka tlarhnung an veng chungin point an hlawh chhuak lo a, inkhel an thlirlet apiangin vanduai an inti ang.
City an thiam
Watford khelmuala hnehna chang turin City-in harsatna an tawk lo a, Pep-a nauten awlsam takin Premier League table chung ber an luah - minute lina aṭangin goal an khung ṭan a, Sterling chuan City goal hmahruai a khung.
City an thiam a, hun rei pawh a liam hmain Manchester United sawp theitu Watford hi an 'comeback' dawn lo tih a chiang tawh a, Pep-a naute ball in pass leh movement mawi chu football hmuhnawmna pho chhuaktu a ni.
Minute 31-naah Silva a inlar a, Watford goalkeeper Daniel Bachmann chuan Ilkay Gundogan-a shot a dan per hnuah Silva ke bulah a tla a, Pep-a'n Premier League-a player ṭha ber anga a chhal hian mawi zeta defender pahnih a bum hnuah angle tight tak aṭangin a khung.
Silva hian a la duhtawk lo - minute 63-naah mawi zetin goal chung kil sirah a thlawh lut a, a duhnaah tak a thlawh lut ni berin a lang. Watford tan Cucho chuan minute 74-naah post a pet per hnuin a per lehlam chu a khung a, goal dang erawh an thawk chhuak zui lo.
Minute 10 emaw 15 velah khan inkhel kha tawp thei ni hialin ka hria - a pawimawh ber chu inkhel thunun tura kan khelh ṭhat kan chhawm nung thei kha a ni. Goal thum mawi em em kan khung a, kha aia tam zawk pawh khung thei kan ni. Hmahruaitu nih hi a nuam a, mahse, point hi chu kan la hloh leh ang - chutihrual chuan kan elpuite pawhin an hloh ve tho ka ring a, kawng zawh tur thui tak a la awm a ni.
- Pep Guardiola, Manchester City manager
Game pawimawh tak a ni a, a harsa em em bawk. Thli thawt dan khan inkhelh a ti harsa a, a bik takin inkhel thununtu tan a ti harsa lehzual. Chance tam tak kan hlah a, Wolves counter-attack ven a ngai bawk si.
Khatiang hun harsaa kan khelh dan khan min tilawm a, bul ṭan ṭha lo mah ila, finishing lamah beisei kan phak lo deuh tih lohah chuan kan khel pangngai viau e. Tha thlah loh kha kan mamawh a, a tawpah chuan club legend Divock Origi-a'n a rawn chingfel a, thawnthu ngaihnawm tak a ni. - Jurgen Klopp, Liverpool manager