Chelsea pawng tur tudaitu Hammers

West Ham lakah 3-2 in Chelsea an tlawm a, Thiago Silva leh Mason Mount hmangin Blues hian vawi hnih ngawt hma hruai mah se Hammers-in Manuel Lanzini (penalty), Jarrod Bowen leh Arthur Masuaku hmangin an chhang a, an chak daih!

Chelsea an tlawm avangin table-ah pathumna an ni ta a, hmahruaitu Manchester City chu point hnihin an phak lo - tun season-ah Hammers hian Leicester City, Tottenham Hotspur, Liverpool, Manchester United, City leh Chelsea chu inelna hrang hrangah an hneh tawh.

Chelsea an chuai?
Thomas Tuchel hnuaiah Chelsea tum an châkawm ngai lo a, tun hnaia result nei ṭha lo Hammers tan pawh beisei a sang lo - minute 28-na lekah Silva chuan goal hmahruai a tauh goal nghal a, Blues an chak ngei a rinawm nghal.

Mahse, Jorginho-a back pass chhe zet chu Bowen-a'n a nangching a, Chelsea keeper Edouard Mendy-a'n a pet chhuah hman loh avangin Bowen a ti tlu a, penalty a chawi - minute 40-naah Lanzini chuan chiang taka Mendy bum chungin si phurh sut nan a hmang.

A tawpah Hammers
Chelsea an ngawi rei lo - minute li hnu lawkah Mount-a goal hmangin hma an hruai nawn a, an chak ngei a rinawm. Mahse, Hammers-in chak an tum ngam tlat. Minute 56-naah Bowen-a'n si phurh a rawn sut a, hun tawp nan minute thum chiah a awm tawh tihah Masuaku chuan chakna goal a khung zui!

Minute 87-naa Masuaku-a goal khung hi a cross dawn emaw tiin Mendy-a'n ball kal dan tur a chhut sual a, chutihrual chuan Masuaku hian a tum ang renga pet a ni bik loin a lang - a tawpah erawh vanneih nan an hmang a, Chelsea an tlawm.

Masuaku goal kha chu vanneih vang a ni pakhat a, mahse, football-ah chuan chak turin vanneihna hi kan mamawh fo a ni. Tun hnai game ṭhenkhatah kan vannei tawk lo a, zaninah kan hun a inherchhuak ve ta a ni.
- David Moyes, West Ham manager

Inkhel pumpui thlirin kan tisual hnem lutuk a, game thum vel a zawn tihsual tawh chuan result ṭha a neih reng theih lo. Kan match neih leh hun neih dan thlirin a chang chuan kan chau ve deuh ṭhin tih ka pawm a, mahse, chu pawh insiamrem kan zir mai tur a ni. Tlawm kan duh lo a, mahse, pawm a ngai. Lawm lohna viau tur khawp chuan kan khel hran lo a, mahse, a pumpuia thlirin insiamṭhat kan mamawh. Zaninah khan chak ta ila, nomawi kan hlawh lo ang. Chutiang chiah chuan kan tlawm tak avangin nomawi kan hloh tihna a ni lo. - Thomas Tuchel, Chelsea manager