Barca & Atletico an tlawm - Real an chak

Xavi hnuaia insiamṭhat tum Barcelona an insiamṭha hleithei lo - league match hnih a zawna an chak hnuah Real Betis chu 1-0 in an ngam lo a, Juanmi chuan inkhela goal awmchhun hi a khung.

Barca chak loh hnu lawka inlan Atletico Madrid an chak zo bik lo a, an mikhual Real Mallorca lakah 2-1 in an tlawm. Atletico hian Matheus Cunha hmangin goal hmahruai khung mah se Mallorca tan Franco Russo leh Takefusa Kubo ten an chhanglet a ni.

Real Madrid-in Barca leh Atletico tlawm thu hre sain Real Sociedad an lenchilh a, Vinicius Jr leh Luka Jovic goal khung hmangin 2-0 in an chak.

Carlo Ancelotti enkawl Real hi La Liga-ah pakhatna an ni mek a, Barca hi pasarihna niin Atletico erawh palina an ni thung; 1-0 a Villarreal hnehtu Sevilla chu pahnihna an ni mek.

Xavi a tlawm
Barca-in Xavi an neih hnuah league match hnih a zawnin an chak nghal a, Champions League-ah Benfica an inhnehtawkpui thung - an phur vanglai takin Betis an mikhual a, hlawhchhuah nei loin Inrinni zan an mangṭha.

Catalan club tan Philippe Coutinho chuan inkhel ṭantir lamah chance nei mah se goal-ah a chantir lo a, bench aṭanga luhtir Ousmane Dembele-a'n an khelh danah danglamna thlen mah se goal a pai tel lo bawk.

Minute 79-naah Betis zawkin offside vanga a goal hmasa zawk pawmsak loh Juanmi hmangin an khung ta nge nge a, an chak - Barca hi hmahruaitu Real aia match khata khel tlemin point 16-in an thlau mek.

Barca hian Nilaini zan dar 1:30-ah Bayern Munich chu Champions League khel turin an lenchilh dawn a, last 16 lut turin chak ngei ngei an mamawh.

Atletico an buai
Atletico-in minute 68-naa Cunha goal hmangin Mallorca lakah hma an hruai a, mahse, mikhual team hian Russo ball tauh ṭha zet hmangin an si phurh chu minute 80-naah an sut.

Madrid khaw club goal chhuah hun a tlai a, goal dang khung turin minute a tam tawk tawh lo. Mahse, mikhual zawk bawkin goal khung an harsat lo tih an pholang a, hun pek belh minute khatnaah Kubo chuan chakna goal a khung.

Japanese forward Kubo hi kum 20 mi a ni a, Real Madrid aṭangin Mallorca-ah hian loan-in a khel - a club tak zawk hmelma lakah chakna goal a khung zui.

Hetihlai hian Sevilla chuan 1-0 in Villarreal an hneh a, goal awmchhun hi minute 16-naa Lucas Ocampos khung a ni - pahnihna an ni a, point riatin Real an phak lo.

Real an chak
An khingpui team an tlawm laiin Real an chak a, team ṭha Sociedad chu 2-0 in an hneh. Real tan Vinicius a chet ṭhat chhunzawm zel a, Brazilian forward hian minute 47-naah tun season La Liga-a a goal 10-na a khung.

Real-in an duhtawk lo - hliam vanga minute 17-naa lakchhuah Benzema thlaktu Jovic chuan tun season-a a goal hmasa ber a khung ve leh a, 2-0 in an chak. Real chak mah se Benzema inhliam vangin fans an hlauthawng.

Madrid boss Ancelotti chuan, "Benzema hliam hi a na lutuk loin a lang a, mahse, Thawhlehni zana Inter Milan hmachhawn hunah a inlan thei lo ang," a ti. Real hian Champions League last 16 lut chiang tawh mah se group stage match tawp ber an la khel dawn a ni.

Atletico pawhin Thawhlehni zanah Porto an lenchilh dawn a, last 16 lut turin chak bakah Liverpool lakah AC Milan an tlawm tel a ngai.