Newcastle an chak ve ta

Premier League match 15 an khelh hnuah Newcastle United chuan a vawi khat nan hnehna an chang ve ta. Magpies hian Inrinni zan khan Callum Wilson-a goal khat hmangin Burnley chu 1-0 in an hneh.

Saudi Arabia sumdawng hausa kutah lut mah se Newcastle hian sum an la hmang pawp pawp thei rih lo, an tih theih hmasa chu manager thlak niin Eddie Howe an lalut. Howe hian an beisei angin a chet ṭhatpui nghal mai lo.

Tlahniam thei dinhmunah an ding reng a, boruak rit tak hnuaia an awm laiin Wilson chuan St James' Park-a inkhel entute lawmna a thlentir a, an goal an venhim bawk avangin point thum hlu tak an hlawh chhuak.

Newcastle manager Howe chuan, "Premier League kan khel chhunzawm zel ang tih hi ka sawi ngam. Kan khelh dan phung ṭha tak kan chhawp chhuak zel thei turah ka ngai a, chumi tur chuan inrintawkna a pawimawh," a ti.

Burnley hneh mah se Newcastle hmabak a hautak chhunzawm dawn. December thla chhung hian Leicester City, Liverpool, Manchester City leh Manchester United te an hmachhawn a la ngai dawn.

Howe chuan, "Tun hma lam boruak leh thil thleng tawh kan chhut kir a, thlasik laia point hmuh theih hi a pawimawh ṭhin. Chuvangin December thla chhunga team ṭha kan hmachhawn tur lak aṭangin point hmuh kan tum ang," a ti.

Newcastle hian point 10 hmuin a hniam ber dawt an ni mek, a him china awm Watford point hmuh zat pawh 13 chauh a la ni a, season chanve an la hman tlin loh avangin a hniam bera awm Norwich City tan pawh inhamtan beiseina a la awm.