Messi leh PSG an chelh

Paris St-Germain leh Lionel Messi tan French Ligue 1 a awlsam thei rih lo. Paris club hian hun tawp dawnah substitute Georginio Wijnaldum hmangin an si phurh an sut hram a, an mikhualna ramah Lens nen 1-1 in an inhnehtawk.

Inkhel chawhma lamah goal a lut lo, minute 62-naah Seko Fofana chuan Lens tan goal hmahruai a khung. Hun tawp dawn thlengin PSG lamin goal an khung thei lo, bench aṭanga lut Kylian Mbappe siamsak Wijnaldum-a'n a khung hram.

Lens goalkeeper Jean-Louis Leca-a'n Angel di Maria goal khung tur a dansak ṭha takzet a, chutih rualin PSG goalkeeper Keylor Navas pawhin goal khat an phurh hnuah David Costa khung tur ṭha zetin a dansak ve bawk, goal hnih phur ta se PSG tan thawhchhuah a harsa ang.

Mauricio Pochettino nauten ball possession 65% ngawt an nei thei a, mahse Messi meuh pawh awm mah se goal khung an harsat hle. Barcelona captain hlui hian Ligue 1 match kua a khelh tawh aṭangin goal khat chauh a la khung a ni.

Chak zo lo mah se Ligue 1 table-ah PSG hian hma an la hruai fal hle, match 17 aṭangin point 42 an hmu tawh - anmahni hnaih bertu Marseille chuan point 29 an hmu tawh thung, pahnihna hi match khata an khelh tlem avangin an inkar erawh a la danglam leh thei.

PSG manager Poch chuan, "Pawn lam aṭanga en mai aiin Ligue 1 hi a awlsam lo tih chu a chhungah hian a hriat. Tun ṭumah pawh khan team ṭha leh khawng tak kan hmachhawn a, point hmuh kha an phu hleah ka ngai.

"Ka naute an khel chhe lo, a bik takin bench aṭanga rawn lut ten danglamna an rawn thlen avangin ka lawm. Match khelh tur kan ngah avangin player khel thei neih tam hi a pawimawh," tiin a sawi.

Ligue 1 hmahruaitu hian Thawhlehni zan dar 11:15-ah Champions League group match hnuhnung ber atan Club Brugge an hmachhawn zui lehnghal ang.