Mourinho enkawl Roma an mualpho
Jose Mourinho kaihhruaina hnuaia beiseina nei thar AS Roma chu Inter Milan lakah 3-0 in an tlawm a, inkhelh banah Mourinho a lungawi lo hle - an tan champion sawi ngam a harsa tawh ang.
Inkhel dangah AC Milan chuan Salernitana 2-0 in an hneh a, champion tum ngam zinga mi Napoli chuan anmahni el phak Atalanta chu 3-2 in an hneh lo thung; table chung lam inum boruak a nung ṭha hle.
Inter an tlawm
Inrinni zan Stadio Olimpico-a inkhelah mikhual Inter hi kawng tin rengah an chungnung zawk a, chawlhlawk hmaa goal thum khungin chak zawk tur a chiang hma hle, mualneitu Roma lamin target zawnah vawi khat bak an pet ve thei lo.
Inter tan hian Hakan Calhanoglu-a'n minute 15-naah goal a khung ṭan a, midfielder Calhanoglu hian striker Edin Dzeko tana a siamsak bakah Denzel Dumfries chuan khung belh lehin nuamsa takin hnehna an chang.
Roma hian hrem vangin Tammy Abraham an chhawr thei lo. Chelsea aṭanga an lak striker Abraham hi tlarhma lamah chuan an player neih hriam a ni a, a tel lo chuan an goal nawr pawh a na tawk lo hle.
Ngaihdam a dil
Inkhelh banah Jose Mourinho-a'n media hmaah a lungawi lohna a ti lang nasa a, journalist ho pawh ṭawngkam mei nei tak a hman khum. A thil tih vangin Portuguse manager hian a hnuah ngaihdam a dil.
Mourinho chuan, "Studio chhunga awmte, zawhna zawttu leh lo ngaichangtute chungah ngaihdam ka dil," a ti a, a player hliam leh hrem tam lutuk chu an tuar tih a sawi. Abraham leh Rick Karsdorp te an hrem bakah Stephan El Shaarawy, Lorenzo Pellegrini leh Leonardo Spinazzola te an inhliam, hri leng vangin Felix Afena-Gyan a inlan thei lo bawk.
Mourinho chuan, "Season hmasa khan Inter hian Roma aiin point 29 zetin an hmu tam zawk, tunah pawh a nihna tak sawi chuan team ṭha zawk an la ni a, kan inkar hi a zim thei ang bera kan siam a ngai dawn," tiin a sawi.
Milan an chak
Champion tum Milan pawhin kawng dik an zawh chhunzawm. Sassuolo laka an tlawm hnuah a zawnin vawi hnih hnehna an chang leh ta. Milan tan hian Franck Kessie leh Alexis Saelemaekers ten goal khat ve ve an khung.
Milan hian hliam vangin Simon Kjaer an chhawr thei lo ṭan a, an defender pawimawh leh captain ni bawk hi khup hliam vangin tun season chhung chu an chhawr theih a beiseiawm tawh lo a ni.
Serie A match 16 an khelh tawh chinah Milan hian point 38 hmuin hma an hruai a, pahnihna Inter aiin point khatin an sang zawk. Season hmasa ang bawkin Milan club pahnih hian Italian champion nih an inchuh leh dawn a, season chawhnu lama zuih loh a pawimawh ang.