FIFA World Cup 2018 Final ; France Vs Croatia

Khawvela inelna ropui ber, FIFA World Cup 2018 kharna chu Pathianni zan hian Luzhniki Stadium, Moscow-ah neih a ni dawn.

Zan dar 8:30-ah vawi khat champion tawh France leh la champion ngai lo Croatia te an inhmachhawn ang.

Inkhel pawimawh ber
France captain Hugo Lloris chuan, "Kan dam chhunga inkhel pawimawh ber," tiin a sawi a, he thusawi tho hi Croatia te infuihna tur a ni.

World Cup hi football inelna satliah a ni lo a, ram ropuina lantirna pakhatna a ni a, player dinhmun tidanglamtu a nih avangin final hlut dan hi sawifiah theih a ni lo.

Tawnhriat nei
Kum hnih liam ta khan France chuan Euro 2016 final an thleng a, Portugal an hneh loh avangin an lawmna hun turah rilru nain inelna an khar a, tun thlengin he ser hi a la cham bang.

Semfinal-a Belgium an hneh zawhah Paul Pogba chuan, "Kum hnih liam ta ang kha a thleng nawn tawh tur a ni lo a, khelh hmabak pakhat ka la neih avangin final kan lut hi kan lawm tur a ni lo. Kan champion chauhin kan lawm ang," tiin player-te a fuih a, he thu a sawi lai hian head coach Didier Deschamps pawh a awm.

Tun ṭumah hian Pogba bakah player pariat chu Euro 2016 final thleng thei an ni a, tawnhriat nei ṭha Olivier Giroud pawh a awm.

Chelsea striker Giroud chuan, "Germany kan hneh zo kha kan phur ta lutuk a, hna kan zo tawhah kan ngai. Tunah chuan a dang tawh," tiin final khel tura an inpeih thu a sawi.

Tun ṭuma coach Deschamps hi World Cup-a France champion puitu captain kha a ni a, Euro 2016 final thlenpuitu coach a ni bawk.

Deschamps hian player leh coach nichungin an ram champion pui theihna hun ṭha a nei a, Brazilian Mario Zagallo (1958, 1962 & 1970) leh West Germany legend Franz Beckenbauer (1974 & 1990) te hnung zui thei dinhmunah a ding.

Ram hmangaihtu Croats
Croatia Football Federation president nilai chu Davor Suker a ni a, ani hian 1998 World Cup-ah khan golden boot dawngin semifinal-a France an hneh loh ṭuma goal khungtu kha a ni.

He team-ah hian Zvonimir Boban chu captain a ni a, ani hi Croatia-in zalenna an neih theihna kawnga mi pawimawh a ni bawk.

Croatia-ah hian mipui maktaduai 4.15 vel lek an awm a, World Cup final thleng thei ram zinga mihring tlemna ber a ni a, ram hrang hrang tana chona siamtu an ni a. Tun ṭuma Croatia jersey hatute pawh hi ram tan chuan an theihna zawng zawng baka khel thei an ni a, France hi rinkai ni mah se chak chianga dah an rem lo.

Ivan Rakitic chuan khawsik chungin England a hmachhawn a, semifinal-a player khel ṭha ber zingah a tel pha tho. Barcelona midfielder, "A ṭul a nih chuan ke nei lo pawhin final ka khel ang," tiin ram tana an inpek thu a sawi a, tun World Cup-a tlan tam ber captain Luka Modric inpekna leh thiamnaah rinhleh tur a awm lo.

Croatia coach Zlatko Dalic chuan, "Ka hmuh dan chuan Lionel Messi hi khawvela thiam ber a ni a, Neymar hian a hnaih viau bawk. Kumin World Cup-ah erawh star awmna team an tla tawh a, chuvangin tlarhnung phui taka rem thei team an dingchang. Team thawhhona chu a pawimawh ber a ni. Kum 10 chhung kha chu team angin kan khel lo a, tunah chuan kan inlungrual a, chu chu kan danglamna a ni," tiin team inlungrualna a pawimawh thu a sawi.

Engtin zel?
France lamin Giroud, Antoine Griezmann leh Kylian Mbappe te tlarhmaah an nei a, tlarhnung pui turin midfielder ṭha Pogba, N'Golo Kante leh Blaise Matuidi te an kawl a; coach Didier Deschamps-a'n football mawina nena champion nomawi chawi kher a tum dawn lo a, risk la loin tlarhnung rem phui chungin hnehna chan a tum dawn.

Croatia lam pawh an fimkhur ve tho a rinawm, amaherawhchu France angin midfield-ah tharum ngah an nei ve lo. Ball pass thiam pahnih Modric leh Rakitic te midfield-a an kawl avangin goal venghim tawpa khelh a rem ve dawn lo. Coach Zlatko Dalic-a'n tlarhnung tihphui nan goal a nawr tel a ṭul dawn a, mual sir lama awm Ivan Perisic leh Ante Rebic te an pawimawh ang.