Serena hmachhawn tur Kerber

Serena Williams leh Angelique Kerber ten zanin dar 6:30 hian Centre Court-ah Wimbledon 2018 hmeichhe singles final an khel dawn a, player pahnihte hian semifinal-ah straight set ve ve in an khingpui an hneh.

American star Serena hian Julia Gorges 6-2, 6-4 in an hneh a, Ningani zan semifinal inkhel pakhat zawkah Germany nula Kerber chuan Jelena Ostapenko 6-3, 6-3 in a hneh ve bawk–Kerber hian a hnampui hnehtu lakah phuba laksak a tum dawn a, world number 1 hlui Serena tan Wimbledon title pariatna tur a ni thung ang.

Player pahnihte hi 2016 final-ah khan intawng tawhin Serena-i'n hnehna a chang, tun ṭumah hian a chak leh a nih chuan Margaret Court-i record nih rualin Grand Slam nomawi 24-na tur chiah a ni dawn, chutihrualin a khingpui tur Kerber hi 2016 Australian Open final-a a ngam loh a nih avangin a kawng a awlsam dawn bik lo.

Duhsak tlak Serena

Nikuma fa a neih hnuah Serena hian Grand Slam final a khelh lehna hmasa ber tur a ni a, ranking hniam tak ni mah se duhsak taka seeded 25-na an nihtir chhan a ti hlawhtling chho mek.

Kum 36 mi Serena hian semifinal a thlen hma hian world ranking lama a sang 50 chin a hmachhawn miah lo a, fiahna hautak a hmachhawn lo a tih theih. German nula Gorges erawh seeded 13-na ni phak a ni, player ṭha a hmachhawn hnuah Serena a khel ṭha zual sauh a, a service vawi khat chiah hloh in dinhmun hlauh thawnawmah a ding lo.

Chak lo zawk Gorges hian semifinal thleng turin court chhungah darkar 10 chuang a hmang, a sang player pali zinga hun hmang rei ber a ni. Inkhel pawimawh leh boruak sangah a taksa a chau tih a hriat, darkar khat leh minute 10 chhung lekin a chak lo zawkah a ṭang.

World number 181 Serena chuan, "Tun hnai thla 16 chhungin tournament pali chiah ka khel a, hei vang hian Wimbledon khelh pawh a awlsam lo hle. Mipuii min ṭan em em tih ka hria a, chu chuan phurna nasa tak min siamsak," tiin a sawi.

Kerber a inpeih

Grand Slam vawi hnih champion tawh Kerber-i'n a vawi hnih nan Wimbledon final a khel dawn a, season hmasa French Open champion Ostapenko a sawp theih avangin Serena lakah pawh a zam dawn lo.

Kum 30 mi Kerber hian tun Wimbledon hi a khel ṭha hle a, second round-a set khat a hloh bak set a la hloh nawn leh lo. World number 1 hlui hian a service hmasa 77% zet ti dikin, a khingpuiin a hmuh zat 58% nen a inthlauh hle. Serena (65%) ai pawhin a ṭha fal a, a service ṭha hi final-ah pawh a hmachhuan tur a ni ang.

German nula Kerber chuan, "Grand Slam final ka thleng ve leh thei hi ka lawm a, a bik takin Centre Court-a inkhel tur kan nih tawh hi chuan a hlu danglam bik hle ṭhin a ni. Match hmasa lama ka khelh tawh ang khan khelh zui leh ka tum dawn a ni.

"Semifinal-a ka khingpui Jelena khan a khel ṭha hle a, point hnuhnung ber thleng khan a theihtawp a chhuah. Unforced errors vawi hnih chiah ka neih laiin ani khan ṭum 19 a nei thung kha kan danglamna a ni," tiin Latvian nula nena an inkhelh chungchang a sawi.