Mapuia telna India U18 champion

South Asia Basketball Association qualifying round for FIBA U-18 Championship khelh zawh takah India Under 18 Team an champion a, India team-ah hian Mizo tlangval H. Laldinsanga (Mapuia) chu assistant coach a ni.

Dhaka, Bangladesh-a inelna neihah India hian gold la turin Sri Lanka (112–53), Nepal (94–48), Bangladesh (107–47) leh Maldives (115–60) te an sawp vek a, Rajeev Kumar chuan point 104 neiin score hnem ber a ni a. India hi pakhatna an nih avang hian August 5 aṭanga Thailand-a neih tur FIBA U-18 Asian Championship atan an tling.

India Under 18-ah hian Aman Sharma chu coach a ni a, Mapuia hian a pui a ni. Saron Veng tlangval hi Mizoram Super League season hmasa ber Most Valuable Player a ni a, a team enkawl Khatla TBL chu MSL hmasa pahnihah champion pui.

Mapuia hi Mizo zinga India aiawh khel hmasa ber a ni a, India Senior Team-ah assistant coach hna chelh tawhin India Under 18 Team-ah assistant coach hna a chelh leh bawk. Mapuia chuan, "India team ka enkawl thei hi ka lawm a, hmasawnna tur pawh a la tam hle. Tuna player-te pawh hi zirlai an ni hlawm a, Mizo naupang tan hmun a awm a, tei rei peih a ṭul a ni," tiin thlen chin aṭanga hmasawn a la ṭul thu Vanglaini a hrilh a, a thawhna DIET (Aizawl), SCERT leh Education Department te chungah lawmthu a sawi bawk.