Chelsea-in Conte an ban

Premier League club Chelsea chuan an coach Antonio Conte nen kum hnih chauh hun an hmang hman tihin Italian manager hi an ban a, he thu buatsaih lai hian Conte thlaktu tur an la puang lo.

London club hian nimin khan Conte nena an inṭhen thu hi an puang a, "A hma hun lo awm zel tur atan Conte hi duhsakna kan hlan a ni," an ti a, Italy boss hlui hmun ruakah hian Napoli manager hlui Maurizio Sarri chu awm tura beisei a ni.

Chelsea leh Conte

Kum 48 mi manager hian tun kar tir khan pre season training nei turin Chelsea a zawm a, Stamford Bridge-ah a cham dawn emaw tih laiin ban a ni ta zawk.

Conte hian 2016-17 season ṭan dawn khan Chelsea hi a zawm a, a season hmasa berah Premier League nomawi a chawipui. Season hman zawh takah FA Cup-ah champion mah se Champions League an khel phak lo a, hei hi an ban chhan ber niin a lang.

Tu nge Sarri?

Conte thlak tura rin ber Maurizio Sarri hi he thu ziak i chhiar meuh chuan Chelsea boss a ni chiang tawh hial mai thei. Nomawi liantham chawi la nei lo mah se Italy-ah coach langsar a ni.

Napoli-ah kum thum hun a hman chhungin pahnihna, pathumna leh pahnihna a nihpui a, Juventus rorelna paih thla 'teuh' ber a ni. 2016-17 season khan Serie A Coach of the Year-ah an thlang.

Chelsea leh manager

Blues-in Conte an ban thu a chian rual khan kum 2003-a Roman Abramovich-a'n London club a lei hnuah manager nghet an neih an ban vawi kuana a ni a, Claudio Ranieri khan kum li enkawl hman mah se Abramovich-a'n a lei hnuah thla 12 bak a daih lo.

Jose Mourinho, Carlo Ancelotti leh Roberto Di Matteo te pawhin nomawi an chawi vek chungin an chet chhiat ve leh an hna aṭanga chawlhtir vek an ni a, Guus Hiddink leh Rafael Benitez ten manager lailawk hna an chelh hman bawk.