Nomawi inchuh tur chu

World Cup nomawi hmasa ber chu ram hrang hrangin football-a inelna an neih theihna tur tournament rawt chhuaktu hming chawiin Jules Rimet Trophy tih a ni a, nomawi hi Goddess of Victory-in nopui kil riat nei a keng lai a ni.

Kum 1966-a England-a World Cup khelh a nih ṭum khan a tihlar nan Jules Rimet Trophy hi phochhuah niin rukbo a ni a, amaherawhchu ui pakhat ‘Pickles’ chuan thingkung bula an phum chu a hai chhuak leh hlauh.

Kum 1970 WC khan a vawi thum nan Brazil an champion a, nomawi hi an nei hlen nghal. Amaherawhchu, 1983 khan Rio de Janeiro-ah rukbo an ni leh a, an hmu leh tawh lo.

FIFA chuan World Cup vawi 10-na atan nomawi thar a duang a, ram pasarih aṭangin design 53 zet thehluh a nih hnuah Italian artist Silvio Gazzaniga kut chhuak chu thlan a ni.

Tuna nomawi hman lai hi danin a ziah angin neih hlen theih a ni tawh lo. Final khelh zawhah champion team hming inchhut kaina chu champion ram hnenah pek an ni a, neih hlen theih a nih loh avangin a hnuah a anpui (replica) an pe thung.

World Cup nomawi hi Italian company, trophy leh medial siam ṭhin GDE Bertoni te kut chhuak a ni a, a replica ringawt pawh hi a siam hun chhung hi thla thum chhung a ni. World Cup nomawi tak tak hi 75% rangkachak a luan a ni a, a hlut zawng hi pound maktaduai 10 vel a ni.

GDE Bertoni hian trophy chauh niloin World Cup medal pawh an siam bawk a, heng bakah hian Champions League, Europa League leh UEFA Supercup nomawite hi an kut chhuak a ni bawk.