Hmingṭhat inchuh inkhel ; England vs Belgium

"It's coming home," tiin tui takin zai hman mah se English fan-te beisei angin thil a thleng lo a, World Cup final niloin pathumna inchuh inkhel zawk an hmachhawn a ṭul ta.

Belgium-in 'golden gene­ration' tih meuhin an team-ah beiseina an nei sang a, an tawp chin erawh World Cup semifinal a ni a, an beisei san ber chu pathumna nih a ni.

Zanin dar 7:30-ah team pa­hnih hi pathumna nih inchuhin an inkhel dawn a, final boruak phak dawn lo mah se team ṭha tak inhmachhawn tur, hmingṭhat hlawh tuma inkhel tur an nih avangin a hmuhnawm ang.

England coach Gareth South­gate chuan, "Ṭha taka tour­nament khar hi keimahni mai niloin fan-ten an phu a, mi zawng zawngin tun ang hun ṭha hi an nei lo," a ti a, pathumna nih inchuh inkhel chu team dang thlen phak loh a nih thu a sawi.

Intawnna hmasa

Group Stage-ah team pahnih hi an lo intawng tawh a, Adnan Januzaj goal mawi khung hmangin Belgium hian 1-0 in hnehna an chang. He inkhel hi team pahnih khaikhin nan erawh hman chi a ni lo - an ṭhat dan berin an khel lo ve ve.

Group G-a awm team pahnih hi an vannei a, Tunisia leh Panama an hmachhawn hmasak avangin an group-a match hmuhnawm ber tura ngaih hi a thlen meuh chuan last 16 lut turin an pahnihin an tling chiang tawh.

Zaninah team pahnih inrem dan tur hriatthiam a harsa - hmingṭhat inchuh tur an nih avangin an regular XI an khelhtir thei a, chutihrualin semifinal khel chau an nih avangin an in hahchawlhtir thei bawk.

A bik takin England-in semifinal-ah minute 120 ngawt an khelh avangin an chau ang tih a chiang a, Gary Cahill, Eric Dier, Trent Alexander-Arnold leh Jamie Vardy te ho kan hmu a nih pawhin a mak lo ang.

England an ngui

Three Lions-in minute 68 thleng Croatia lakah hma an hruai a, minute 22 chiahin World Cup final an thlenna tur a dang tawh - mahse Croatia tan Ivan Perisic-a'n si phurh sutna goal a khung a, Mario Mandzukic-a'n extra time-ah chakna goal a khung zui.

England player-ten final an luh teuh zia an thlir nawn fo ang a, an la ui dawn chauh ang. Southgate chuan, "Hnehna chang thei kan ni tih kan ngaihtuah let a, kan chak loh tuka training neih kha chuan kan ngui em em vek a ni.

"Chak thei kan ni a, mahse team tawnhriat ngah zawk, rilru puitling zawk leh keini aia thiam zawkin a tawpah hnehna an chang a ni. Mahse, kha kha World Cup semifinal chu a ni a, kan hma hun atana min chher hriamtu a ni," a ti a, an tawnhriat an chhawr ṭangkai tur thu a sawi.

England captain Harry Kane chuan, "Euro 2016-ah khan fan-te an hnual em em a, World Cup 2018-ah pawh chutiang bawk chu a ni. Mahse, chumi inkar boruak erawh a inthlau em em si," tiin hma an sawn thu a sawi a, zaninah fan-te hnual nawn tir a tum lo.

De Bruyne leh beiseina

Belgium-in semifinal an khelh thlengin tlawm hmel an hmu lo a, a thiam pali zinga tel tur hian Panama, Tunisia, England, Japan leh Brazil an hneh thei.

Semifinal-ah France an tawng a, an khel ṭha viau na­chung­in hnehna an chang lo. Bel­gium midfielder Kevin de Bruyne chuan, "Kan inkhel kha kan thlirlet chuan 50/50 a ni a, Samuel Umtiti corner chauh kha danglamna thlentu chu a ni," a ti.

Zaninah erawh Manchester City midfielder hian vanduai nawn a tum tawh lo a, a zawna vawi hnih tlawm a tum lo. KDB chuan, "France lakah khan kan theihna zawng zawng kan pe a, a bak tih theih kan nei tawh lo. A chang chuan a tlawm zawk nih hi in pawm mai a ngai a ni.

"Tunah erawh duhthlan tur pakhat chiah kan nei ta a, chu chu England nen kan inkhelh huna hnehna chan ngei a ni. France laka kan tlawm avangin kan hnual em em a, Three Lions lakah hnehna kan chang a nih chuan rilru hahdam zawkin Russia kan mangṭha thei ang," a ti a, tih mai mai a tum lo.

Meunier a inpeih

Belgium-in France an hneh loh ṭumin right back Thomas Meunier chu hrem vangin a inlan thei lo a, a hmunruak luahtu Nacer Chadli-a'n beisei a phak loh bawk si avangin Paris Saint-Germain defender hmunruak zau zia a lang chiang hle.

Zaninah erawh kum 26 mi defender hi a inlan thei dawn tawh a, Roberto Martinez-a'n inkhel bul a ṭantir ngei a beiseiawm. Meunier chuan, "Group stage-ah khan England hi kan hneh tawh a, zaninah pawh kan hneh thei ang.

"Hnehna chan hi kan tih ngei ngei tur a ni hran lo a, mahse chak ngei kan duh. Tunah chuan kan thlen theih sang ber chu pathumna a ni ta a, chu chu thlen kan duh a ni," a ti a, England lakah tih mai mai an tum lo.

England defender Gary Cahill pawhin inkhel tur a thlir lawk a, "Semifinal-a chak lo hlim pahnih kan ni a, a harsa dawn. Mahse, kan hmaa inchhawp match a nih miau avangin ṭha taka khelh a ṭul dawn a ni," a ti a, hmingchhiat a duh lo.