Kan mamawh kan lei - Arsenal boss

Unai Emery chuan Ningani tlai khan Arsenal manager a nih hnua a vawi khat nan press conference a nei a, season thar inbuatsaih nan an mamawh ang player an lei thu a sawi.

Gunners hian nipui bazar chhungin Germany goalkeeper Bernd Leno, Greece defender Sokratis Papastathopoulos, Uruguay international Lucas Torreira leh France Under-20 international midfielder Matteo Guendouzi te an lalut tawh a, player ṭhenkhat an rim mek bawk.

Arsene Wenger thlaktu Emery chuan, "Kan chak lohna lai min thuam chak thei tur kan la a, kan mamawh ang tak kan hmu leh a nih chuan kan la lak belh bawk ang. Club-in player ṭha tak tak a lakluh avangin ka hlim hle," tiin budget nei sang lo tak chunga an bazar danah a lawm thu a sawi.

Spanish manager hian kum 32 mi Laurent Koscielny chu a captain a nih chhunzawm tur thu a sawi chiang a, France international defender hi season hmasa tawp lama a hliam tawrh vangin December thla hma chuan an chawr theih a rinawm loh.

Emery chuan, "Hruaitu chuan player tin a hrechiang tur a ni a, a ṭhiante mizia leh nundan pawh a bel tur a ni. Chu bakah player dang ten an zah leh entawn nih a ngai bawk," a ti. Emery hian a team-ah captain tlak mi panga tal an awm a duh thu a sawi tel a, tun dinhmunah erawh heng player-te hi an hming a sawi theih rih loh thu a sawi bawk.

Arsenal manager Emery-a'n a club thar hi London Colney-ah ngawrh takin training a neih chhoh pui mek, Spanish manager hian kalphung thar neih a tum tih chu a chiang - Arsene Wenger hun lai ai khan an training pawh a hahthlak zawk niin an sawi.

Gunners player-te chu an tlan nasain, an ṭhiante nen an inhriat chian theih nan kut hmangin ball an inpe kual nasa bawk. Thahrui hman tam ngaihna thil chi hrang hrang an tih nasat bakah, phone an hman hun thlengin kaihhruaina thar a awm.