Gerrard hoin Rangers an chak nghal

Steven Gerrard enkawlna hnuaia khel Rangers chuan Liverpool captain hlui hoa an competitive match hmasa berah hnehna an chang nghal a, Macedonian club FK Shkupi chu Europa League first round qualifier-ah 2-0 in an hneh.

Rangers tan Jamie Murphy chuan minute 23-naah goal hmahruai a khung a, hun pek belhah James Tavernier chuan penalty hmangin an goal hnihna a khung ve leh bawk. Second leg hi July 17 zanah khelh leh tur a ni ang.

Season hmasa khan Rangers hi Luxem­bourg club Progres Niederkorn lakah Europa League first round qualifier-ah hian an lo tlawm tawh a, Gerrard-a'n an tlawm chuan a ngaihthiam ve theih loh tur thu a sawi lawk a, a beisei ang ngeiin a nauten result ṭha an pe.

Ibrox Stadium-ah mipui 50,817 an leng a, Gerrard-a hoa Rangers-in competitive match an khelh hmasak berah hian ticket an hralh zo vek. Rangers hian Ningani zan inkhel hma hian Ibrox-ah vek hian friendly match khelin Bury FC chu 6-0 in an sawp a, hemi ṭum pawh hian stadium khatin inkhel en tur an pungkhawm tawh.