Serena hnehtu Kerber a champion

Angelique Kerber chuan Serena Williams hnehin a vawi khat nan Wimbledon champion a ni. Kerber hi hranghlui Steffi Graf (1996) hnuah chuan German nula zinga grass court inelna liana hlawhtlinna chang leh thei hmasa ber a ni.

Inrinni zan Centre Court-a inkhelah seeded 11-na Kerber hian darkar khat leh minute nga chhungin Grand Slam vawi 23 champion tawh Serena hi 6-3, 6-3 in a hneh a, 2016 lama a hlawhtlin tawhna Australian Open leh US Open nen major title pathum a la tling ta chiah.

Kerber-i hun

2016 Wimbledon final khan Serena leh Kerber te an intawng tawh a, American nula a chak. Tun ṭumah erawh Kerber-i'n a hming ṭhat pui ṭhin 'defensive game' aiin 'attacking game' a khel nasa a, a hlawhtlin chhan pawh a tih theih.

Inkhel ṭan chiahah kum 30 mi Kerber-i'n Serena service a chhuhsak nghal a, an inkhelh chhung zawngin vawi thum dang a chhuhsak nawn laiin a service vawi khat chiah hlohin, service hmasa aṭanga chhutin 70% zet point a hmu thei.

German nula Kerber hian na taka a service hnuah tlan hmain a khingpui a nawr chiai ṭhin a, Serena-i'n unforced errors vawi 24 a neih chhan lian tak a ni a. Kerber hian huaisen takin a khel a, a service zawh rualin vawi 48 zet point hmuh tumin a tawlh hma a, inkhelah a chungnung zawk bawk avangin chak phu zawk a ni.

Lunglawm a kim

Grand Slam vawi thum champion tawh Kerber chuan, "Duhthusam a thleng dik ta, player ropui Serena hneh tur chuan ka dam chhunga a ṭha berin ka khelh a ngai tih ka hria a, vanneihna ka mamawh tel bawk," a ti. A hneh tak Serena chu hmeichhe player ropui leh midang tana chona siamtu pawimawh a nih thu a sawi tel bawk.

Kum 36 mi Serena hian nikum November thla khan fa a nei a, fa a neih hnuah tun ṭum hi tournament pali a khelh lehna chiah a ni. World number 181 ni chungin seeded 25-na pek a ni a, final lut tur hian Kerber ang bawkin set khat chiah a hloh.

Final a thlen vanga a lawm thu sawin Serena chuan, "Result hi lawmna tur a ni lo a, chutih rualin bul ṭan thar leh chauh ka nih avangin ka thlen chinah ka lawm. Fa nei tawh zawng zawng te tan ka khel a, nu ni tawh chung pawhin sang tak a thlen theih a ni tih lantir kha ka tum. Mahse, Angelique khan a khel ṭhat em avangin ka champion zo lo," a ti.