Pacquiao a lo kir leh ta

Manny Pacquiao chuan Pathianni zing khan Axiata Arena, Malaysia-ah a la chul lo tih pholangin WBA welterweight title chu Lucas Matthysse hnen aṭangin a chhuhsak.

Kum 39 mi boxer hian champion lai Matthysse hi round sarihnaah a hnek tlu a, kum 2009 hnua a vawi khat nana a khingpui a knockout leh hmasak ber a ni–vawi 60 hnehna a channa a ni a, vawi sarih tlawmin vawi hnih a khingpui a draw tawh thung.

Pacquiao chuan, "Awlsam taka ka knockout mai kha kei ngei pawhin mak ka ti deuh a, khatiang ang taka ka khingpui ka knockout hnuhnung ber kha chu a rei ta," tiin a hlim hle.

Filipino boxer hian hun rei tak chhung atana a trainer-a a lo hman tawh Freddie Roach chu Buboy Fernandez hmangin a thlak a, a trainer thar hnuaia a inhnek leh hmasak berah a khingpui a knockout nghal.

Pacquiao chuan, "Training-naah ṭha takin hna kan thawk a, kum naupang tak ka nih tawh loh avangin ka mil tawkin engkim kan kalpui a, ka trainer leh team member zawng zawng chungah lawmthu ka sawi a ni," tiin a sawi.