MFA Super Cup Vawiin aṭangin quarterfinal

Lalbiakliana Memorial MFA Super Cup 2018 quarterfinal chu vawiin aṭangin Lammualah khelh ṭan a ni dawn.

Chawhma dar 11:30-ah MPL club pahnih Aizawl FC leh Ramhlun North FC te an inkhel ang a, chawhnu dar 2:00-ah Chanmari FC leh FC Zokhawthar te an inkhel ang.

Quarterfinal-ah hian MPL club panga Aizawl FC, Ramhlun North, Chanmari, Chhinga Veng leh Mizoram Police te bakah Aizawl FC Academy, Kanan Veng FC leh FC Zokhawthar te an la dam.

MPL kaithar Chawnpui FC chu first round-ah an tla a, Bethlehem Vengthlang FC-in MPL club vek Aizawl FC an hneh lo a, kumin MPL-a Chanmari West FC aia tel tur Electric Veng FC club erawh tun ṭum inelnaah hian an inlan lo.

2016 I Day Football Final Rematch

Ramhlun North hian MPL khel tura an tlin zawh chiahah I Day Football final an lut a, I League club Aizawl FC nen final-ah an inhmachhawn. Team tenau zawka ngaih Ramhlun North-in minute 76-naah Lalruatfela hmangin hma an hruai a, AFC-in injury time minute linaah Ghanaian forward Bright Middleton-a hmangin an sut.

Extra time-ah goal a lut lo a, penalty shootout-ah Aizawl FC vanneiin 7-6 in hnehna an chang. Ramhlun North-in an hun ṭha an pawh belh avangin tualchhung football inelna sangah nomawi an la chawi lo a, tun ṭumah pawh an hmaah Aizawl FC bawk an awm avangin Samson Ramengmawia hote hian nomawi an duh a nih chuan I League club hi an hneh a ṭul ang.

Aizawl FC hi season liam taa I League-a Neroca chet ṭhatpuitu coach Gift Raikhan hoin an khel a, BVT pawh 5-0 zeta an sawp avangin chak tura rin zawk an ni ang.

Chanmari tan fiahna

Chanmari FC-in coach thar Lalruatliana Sailo hnuaia an match hmasa berah GSA Lungleng 10-0 in sawp thei a, quarterfinal lut turin LKS Hnahlan 4-1 in an hneh leh bawk.

MPL-a vawi hnih champion tawh team tan Zokhawthar hi harsa tur niin a lang lo a, amaherawhchu tun ṭum an hmachhawn tur hi an khingpui hmasa pahnih aia ṭha zawk tura ngaih an ni.

FC Zokhawthar hian FC Khatla leh Lungdai FC bakah Bungkawn FC te an hneh tawh a, an match hnuhnung bera Bungkawn an hnehna zat hi 7-1 zet a ni - an chhe lo.