Semifinal ngaihnawm tak chu

Zirtawpni zan khan Kevin Anderson leh John Isner ten final lut tur zawk an zawng a, darkar ruk leh minute 35 an inkhelh hnuah Anderson-a'n 7-6 (8-6), 6-7 (5-7), 6-7 (9-11), 6-4, 26-24 in hnehna a chang. Wimbledon chanchina match rei pahnihna a ni a, semifinal bikah chuan inkhel rei ber a ni.

Set hnuhnung ber an khelh hun chhung chauh pawh hi darkar hnih leh minute 50 a ni. Tennis match zawng zawng anga chhut pawhin match rei pathumna a ni phak, match rei ber chu 2010 Wimbledon first round match kha niin Isner-a'n Nicolas Mahut hneh turin darkar 11 leh minute nga a mamawh, set hnuhnung bera an inhnehna chu 70-68 a ni hial!

Semifinal chin hi Centre Court-ah a indawta khelh a ni a, champion lai Roger Federer hnehtu Anderson leh Isner-te inkhelh hun chhung a rei em avangin an hnunga inkhel Rafael Nadal leh Djokovic ten an zo ve hman lo, zing dar 3:30 hnu lamah 'curfew' vanga khelh zui theih a ni lo. Inrinni zan khan Nadal leh Djokovic ten an chhunzawm a, darkar nga leh minute 16 hnuah Djokovic-a'n 6-4, 3-6, 7-6 (11-9), 3-6, 10-8 in hnehna a chang.

Nadal leh Djokovic hi vawi 52 an intawnna chiah a ni a, Open Era (1968 hnu lam) chinah anni pahnih aia inkhel hnem an awm lo; Serbian tlangvalin vawi 27 hnehna changin record nei ṭha zawk a ni.

Grand Slam vawi 17 champion tawh Nadal hian French Open nomawi a chawi hnuah, inbuatsaihna tournament khel loin Wimbledon-ah a inlan a, set hnuhnung ber an khelh laiin break point vawi nga ngawt a hmuh a chhawr ṭangkai theih loh avangin a dinhmun ṭha lo zawkah a din phah. Vawi hnih a champion tawhna hmunah tun hnaia result a neih ṭhat loh ṭhin avangin semifinal thlen leh hi result chhia a ni hran lo thung.