Belgium-in history an siam
'The original golden generation' an tih, kum 1986-a Belgium team-in an tih theih loh chu 'The new golden generation' tia hminglem an pek Eden Hazard leh a ṭhianten an ti thei a, World Cup-a an thlen san ber tawngin pathumna an ni.
Belgium hian Inrinni zan khan pathumna inchuhah England chu 2-0 in an hneh a, Thomas Meunier leh Eden Hazard ten goal khat ve ve khungin England-in a chhanletna tur an nei lo.
Kum 1986-ah khan Enzo Scifo, Jan Ceulemans leh Nico Claesen-te ho vanglaiin Belgium hian semifinal an lo lut tawh a, France hneh loin palinaah an tawp zui.
Tunah erawh thawnthu thar an ziak - England-in 1966-a an champion hnua an result neih ṭhat ber hlawhchhuah an tum erawh a hlawhchham ta thung.
Bul ṭanna duhawm
England boss Gareth Southgate-a'n Croatia hneh lo team a-
ṭangin player panga a siksawi a, mahse Harry Kane, Raheem Sterling, Harry Maguire leh John Stones ten inkhel bul an la ṭan vek avangin chak an tum tih a lang.
Martinez-a'n hrem tuar zo hlim Thomas Meunier leh Youri Tielemans inkhel bul a ṭantir tih loh chu player a thlak danglam lo a, tlar hmaah Kevin De Bruyne, Hazard leh Romelu Lukaku te an inkawp avangin Belgium history ziah danglam a tum tih hai rual a ni lo.
Belgium-in minute lina lekah an duh ang ngeiin goal an khung nghal a, Nacer Chadli ball cross chu Meunier chuan England goal-ah a khung a, goalkeeper Jordan Pickford a che hman lo.
England an vanduai
First half-ah Belgium-in inkhel an thunun chhunzawm a, Group G-a an lo hneh tawh team lakah Hazard leh a ṭhiante an thiam zawk. Tlarhmaah England-in chance nei ṭhin mah se an hriam tawk lo.
Chawlhlawk hman a nih hnuah England-in chance an nei hlauhawm zawk a, Belgium an vannei. Three Lions tan Eric Dier-a'n goalkeeper Thibaut Courtois-a chip khum hnua lut tur nia lang chu Toby Alderweireld-a'n line aṭangin a pet chhuak a, Maguire chuan hnai tak aṭangin a tauh out bawk.
Hetihlai hian Belgium tan Lukaku chuan hun ṭha vawi hnih ngawt holam takin a hlah a, minute 60-naah Dries Mertens chuan a thlak.
Hun tawp nan minute riat chiah a awm tawh a, Belgium bawk an che leh ta - Hazard chuan Phil Jones tlan pela ṭha taka ball a lakluh hnuah a pet goal a, hun a tawp zui.
Southgate a lawmna
England coach Gareth Southgate chuan, "Mahni inbum kan tum lo a, hmasawn kan la ngai tih hi kan pawm thlap. Kan hnathawhah kan lawm a, team ṭha zawk lakah beisei phak chiah lo mah ila tawnhriat ropui tak kan zir chhuak a ni.
"Zan thum liam ta maiah kha chuan minute 20 chauhin World Cup final kan khel lo tih kan hriat a ṭul a ni. Ka player-te hi ka chhuang em em a, min hruai thlen chin hi a ropui tih hi an hriat ka duh.
"England kawr ha chunga an tawnhriat hi nakinah kan la chhawr dawn a, tunah chuan phur takin hma hun kan thlir thei tawh a ni," a ti a, an thlen chinah a lawm thu a sawi.