Chelsea manager thar Maurizio Sarri

Premier League club Chelsea chuan Antonio Conte an ban hnu lawkah manager thar atan Maurizio Sarri an lakluh thu an puang nghal a, Italian manager hi kum thum chhung atan contract an ziahpui.

Blues-in Sarri an lakluh thu an puan rual hian pound maktaduai 50-a Jorginho an lakluh thu an puang bawk a, Napoli midfielder hi Manchester City zawm turin inremna thui tak kalpui tawh ni mah se London lamah a pu hlui a zui ta zawk.

Chelsea boss thar Sarri chuan, "Ka career-a hun duhawm ber pawl ka tawng a ni. Fan-te tan football hmuhnawm tak kan phochhuah ka beisei a, he club-in a phu em em nomawi chawi ngei tumin he hmun hi ka lo pan a ni," a ti.

Sarri hnungzuitu Jorginho-a'n Blues-ah kum nga chhung khel turin contract a ziak a, "Club lian tana khel phak nih hi thil awlsam a ni lo a, Chelsea ka zawm thei hi ka hlim takzet a ni," a ti ve bawk.

Chelsea fan-ten coach leh player thar an lawmna kut beng thawm pawh a reh hmain chanchin duhawm lo hriat tur an nei nghal a, Eden Hazard chuan Blues a chhuahsan mai theih thu a sawi.

Real Madrid nena sawizawm Belgium captain chuan, "Ka kal duhna chu in hria alawm," tiin journalist zawhna a chhang a, "Chelsea-a cham ka duh leh duh loh ka sawi thei, thutlukna erawh club kut a ni," a ti zui.