Liverpool tan Shaqiri khel dawn

Premier League club Liverpool chuan Xherdan Shaqiri chu Stoke City aṭangin pound maktaduai 13-in an lalut a, Anfield-ah kum nga chhung cham turin contract a ziak.

Kum 26 mi forward chuan, "Player nih chuan inelna sang ber hma­chhawn zel hi kan duh. He club hi a hma pawhin zawm ka lo duh tawh a, mahse a hlawhtling thei lo.

"Hmasawn zel duh ka nih avangin he hmun ka pan thei ta hi ka lawm a, player ṭha ber ber te nena khelha nomawi chawi ka duh a ni. Liverpool hi club lian tak, sulhnu nei ropui tak, coach ṭha tak en­kawlna hnuaia khel an nih avangin ka phur hle," a ti.

Switzerland forward hian August 2015 khan Inter Milan aṭangin Stoke hi pound maktaduai 12-in a zawm a, a contract neih­laiah pound makta­duai 13-a a chhuah theih tur thu tarlan a nih avangin Liverpool hian an chang ta a ni.

World Cup khelh zawh taka last 16-a Switzerland hruai thlengtu forward hian season hman zawh takah khan Stoke tan goal riat khungin club top scorer a ni a, mahse Premier League-ah a inhamtanpui zo lo.