Hockey World Cup khel tur Remsiami'n London a thleng
Women's Hockey World Cup 2018 chu 21 July aṭanga 5 August chhungin Lee Valley Hockey Centre, London-ah khelh a ni dawn a, Mizo nula Lalremsiami telna India team chuan Pathianni zan khan inelna hmun tur an thleng.
India hi Pool B-ah a thlengtu England, United States leh Ireland te nen an awm khawm a, an match hmasa ber atan July 21 zanah England an hmachawn dawn. An inkhelh kual hnuah a sang pathum an tlang dawn, group hmahruaituin quarterfinal an lut nghal ang a, pahnihna leh pathumna ten playoff an khel phawt thung ang.
World Cup chu
International Hockey Federation hnuaia inelna lian 2018 Women's Hockey World Cup-ah hian ram 16 an inlan dawn a, pool paliah ṭhen niin team pali zel an awmkhawm; khawmualpui lian panga champion te chu an tling nghal–India hi 2017 Hockey Asia Cup champion an nih vanga inlan thei an ni.
2016-17 FIH Hockey World League khelh zawh taka semifinal lut chin tan pawh hmun a awm, chutih rualin world ranking ngaih pawimawh a ni bawk a, team 16 tling thei chin tur hian ranking sang thlan an ni. Group stage inelnaah hian an point hmuh zat a inang nih chuan goal difference en tur a ni a, an intluk a nih chuan an goal khung zat chu dah pawimawh tur a ni a, chumi zawhah chuan head-to-head en leh tur a ni ang.
Sam 37-na
Women's Hockey World Cup 2018-ah hian India tan forward Lalremsiami a inlan dawn a, Kolasib nula hi Mizo zinga hetiang dinhmun thleng thei hmasa ber a ni. World Cup an khelh tur chungchangah Siami chuan Pathianin chakna a pek vanga hetiang dinhmun thleng thei a nih thu a sawi a; Sam 37-na "Amah chu ring la, Aman a ti vek ang," tih chu a inngahna a nih thu Vanglaini a hrilh.
Remsiami hian kum 11 mi chauh a nih laiin an in lum kalsanin Thenzawl Hockey Academy a zawm a, 2016 khan National Hockey Academy-a zir tura thlan niin Delhi lamah a chhuk, hemi kum hian India Junior Camp-ah koh nghal niin, kum khat pawh a awm tlin hmain a theihna a san zia thup theih a ni lo–senior team lamah koh tel nghal a ni.
India tana Common-wealth Games pawh khel tawh Siami chuan, "Keimah chauh Mizo ka awm chang a awm a, ṭawng lamah harsatna ka neih bawk avangin camp chhuahsan châk chang pawh ka nei ve ṭhin," tiin tun dinhmun a thlen theih nan a hun hmasa lamah harsatna a tawh ṭhin thu a sawi.
Player ṭha tam tak karah Siami hi India tan player pawimawh a ni phak zel a, inelna hmachhawn tura koh a nih chuan a ṭangkai zingah a tel ṭhin. World Cup-ah pawh India player pawimawh a nih a rinawm a, August 18 aṭanga September 2 chhunga khelh tur Asian Games-ah pawh a inlan zui dawn tih a chiang tawh bawk a ni.
Mizo dang
Hockey Mizoram hming a mawi chhunzawm zel a, Lalremsiami hming lamrik a nih reng karah India tan Lalrindiki chu 6 Nation Hockey Tournament khelin Belgium-ah a thang mek bawk, inelna hi July 21-ah zawh tur a ni ang.
Hnahthial nula Rindiki hi Siami nen National Hockey Academy (2016) zawm rual an ni a, tun ṭum hi ram aiawhin a feh chhuah vawi khatna niin, an match hmasa pahnihah Ireland (4-1) leh Great Britain (1-0) te an hneh tawh a, Belgium, Canada leh Netherlands te nen an la inhmachhawn leh dawn bawk a ni.
India tana vawi khat inlanna Rindiki chuan, "A hmasa berah chuan Pathian vang a ni a, bul min ṭan puitu Hockey Mizoram leh coach bakah Sports Department chungah ka lawm hle," tiin Vanglaini a hrilh ve bawk.