Ramhlun North lakah Aizawl FC vannei

Lalbiakliana Memorial MFA Super Cup-ah Aizawl FC-in semifinal thleng turin vanneihna an mamawh a, nimin inkhelah I League club hian Ramhlun North chu penalty shootout hmangin 5-4 in an hneh hram. Inkhel dangah Chanmari FC-in Zokhawthar chu 7-1 zetin an sawp a, MPL-a vawi hnih champion tawh club pahnih hi semifinal-ah an inhmachhawn ang.

Vawiin hian Lammualah quarterfinal match hnih khelh a ni leh dawn. Chawhma dar 11:30-ah Mizoram Police FC leh Aizawl FC Academy te an inkhel ang a, chawhnu dar 2:00-ah champion lai Chhinga Veng leh Kanan Veng FC te an inkhel ang.

Penalty a ngai

Aizawl FC leh Ramhlun North ten quarterfinal match hmasa ber an khel a, MPL club pahnih an inkhel tawk. I League club-in ball chang tam hret mah se goal chance-ah erawh an intluk tlang a, chak phu zawk an awm lo.

Hun pangngaiah chak zawk an awm loh avangin penalty hmanga chak zawk zawn a ṭul a, vawi nga ve ve an pet zawhah pahnih ve vein an khung lo. Sudden death-ah pawh a vawi hnihnaah Ramhlun North tana pet Valpuia'n a khung lo a, Aizawl FC an vannei.

Chanmari an chungnung

Zokhawthar-in Chanmari FC ṭhatna an fiah pha lo a, Aizawl khaw pawn club tan MPL club an ṭha mah mah.

Chanmari tan Laldampuia'n minute lina lekah a khung a, Lalrammuana'n minute sarihnaah khung belhin Dampuia bawkin minute 15-naah a khung leh bawk avangin chak tur a chiang der tawh.

Dampuia hian minute 65-naah hattrick a siam a, Lalmuanzova leh Samuel Laltlanthanga ten goal khat ve ve an khung belh a, Zokhawthar player Ramchhuanpuia'n an lamah a tilut bawk a, MPL club-in goal sarih zet an khung. Zokhawthar tan Joseph LR Sailo-a'n goal khat a khung ve bawk.

MPL club fiahna

Aizawl FC Academy tan MPL khelh a theih lo a, anni hi MPL khel loah chuan team ṭha ber zinga mi an ni a, kalphung mumal tak an nei bawk. Hei vang hian Mizoram Police tan AFC Academy hi en liam mai a rem lo ang.

Champion lai Chhinga Veng-in an kakkawngah team ṭha an la hmachhawn lo a, Kanan Veng FC pawhin harsatna an thlen phak a rinawm loh. Kanan enkawltu hi Chhingcows coaching staff zinga mi H. Lalremruata ni mah se an squad a inchhah hleih avangin upset a thlen a rinawm loh.