Premier League club-te ngentu Southgate

England coach Gareth South­gate chuan Premier League club te chu player naupang zawkte khelhna hun pe tam turin a ngen a, "Player naupang chhawr ngam tura huaisen tawk turin ka ngen che u a ni," a ti.

Three Lions hian World Cup semifinal an thlen hnuah Pathianni zan khan Birmingham khawpui an thleng a, hei vang hian goal ruk khunga Golden Boot dawngtu Harry Kane pawhin a hmunah chawimawina a dawn loh phah.

Spouthgate chuan, "Player, mah­­­nia huaisen taka Premier League-a ding chhuak ngam tur kan nei ta nualin ka hria," a ti a, World Cup-ah meuh semifinal an thlen avangin a player ten inrin­tawkna an neih belh nasat thu a sawi.

A harsa dawn

FIFA World Cup under 17 leh under 20 neih hnuhnung berah England an champion a, nikum khan Three Lions U19 chuan Euro nomawi an chawi a, U21 team chuan nikum vek khan Euro semifinal an thleng bawk.

Kum 2018 a her chhuak a, beisei hauh loh England team-in semifinal an thleng ve leh a, an squad an naupan bawk si avangin English football hma hun a eng hleah ngaih a ni.

Southgate chuan, "Kan player-ten tun hnaiah khawvela team ṭha ber ber nen an inel tawk reng tih an pholang tawh. Player naupang ṭha tak tak kan neih bawk avangin senior team-a khelh reng hi a harsa tawlh tawlh dawn a ni," tiin Three Lions hma hun a en thu a sawi.

Trio chunga lawmna

England-in Russia an pan hmaa sawi hlawh ber chu goal­keeper a ni a, tawnhriat nei tam lo tak Jordan Pickford chu Three Lions si ban nghak atan hian thlan a ni a, rin loh takin Lei­cester City defender Harry Maguire leh Tottenham Hotspur defender Kie­ran Trippier te thlan an ni bawk.

Southgate chuan, "World Cup khelhna tur kan pan hma khan player ṭhenkhat chuan ram tan pawh an la khel phak mang lo. He thu ka sawi lai hian Pickford, Maguire leh Trippier te ka rilruah an lo lang a, mahse Russia aṭanga an lo kir meuh chuan player ṭha zawk, tawnhriat ngah leh huaisen zawk nichungin an lo kir a ni," a ti.

Kum 47 mi manager chuan sawi zawmin, "Manager ten hun an mamawh tih hi a dik ngei a, chutihrual chuan player naupang zawkte khelhna hun pe turin rilru huaisen tak in put a ngai tih hi a dik bawk a ni. Player hmasawnna tak tak chu club-ah a innghat a, chutihrualin keinin hun kan lo pek bawk hian club tan pawh a ṭha a ni," tiin Premier League club-te chu thawhpuiah a sawm.

A la tawp lo

England-in World Cup 2014-ah group stage pawh an paltlang thei lo a, Euro 2016-ah team tenau Iceland hmachhawnin last 16 aṭangin an tla bawk - hetih hunlai ai hian tuna an squad a chhah lo zawka ngaih a ni a, beisei neihsan a harsa hle.

Southgate chuan, "A nihna dik takah chuan World Cup-a kan khelh dan khan tumahin kan khelh an ni ring lo a, kan thlen chin kha an rin phak piahlam a ni bawk. Mahse, kha aia sang zawk kha thlen kan duh a, a ṭha zawk duhin kan tuihal zel tur a ni - World Cup final kan thlen lohna kha minute 20 chauh a ni.

"Hetihrual hian kan chak lohna lai pawh kan hmuh hmaih tur a ni chuang lo. Belgium nena kan inkhel kha en ila, anni chuan inkhel thlak danglam hlawk thei player an kawl nual a, chu chu hmasawn kan mamawhna chu a ni," tiin player ten inchher hriam lehzual an mamawh thu a sawi.

Southgate a hmingin!

England khawpui London Hmar Veng lamah veng pakhat England manager hmin tawp lam Southgate nena in ang a awm a, he veng hian lei hnuai 'rel' station an nei a, a hming chu Southgate Tube a ni.

Transport for London (TfL) chuan he stattion hming hi darkar 48 chhung atan a hming an thlak tur thu an sawi a, Southgate station ringawt ni loin Gareth Southgate Station a ni tawh ang!

TfL London managing direc­tor Mark Wild chuan, "World Cup-a England khelh dan khan mi zawng zawng hlim takin min siam a ni," tiin Southgate an chawimawi chhan a sawi a, Middlesbrough boss hlui waist coat ang chu World Cup lai pawh khan an hralh hnem hle.