England vs India ; Zaninah series latu chiang dawn

Englangd-a tour neia zin chhuak mek India chuan vawiin tlai dar 5:00 hian England nena ODI series match thum khelh tura match hnuhnung ber an khel dawn a, he inkhela chak zawk hian series an la ang.

ODI match hmasa berah India hian wicket riatin hnehna an chang a, run 137 vaw chhuaktu Rohit Sharma a langsar hle. Match hnihnaah chak se chuan series la mai tawh tur an nih laiin India an chesual thung a, run 113 siamtu Joe Root chet ṭhat tuar loin an chak lo.

Match hnihnaah hian India tan a bik takin captain hlui MS Dhoni a khel chhia a, ball 59 a hmachhawnah run 37 chiah siamin India-in chak an mamawh laiin defensive game a khel bawk - heivang hian sawisel a hlawh hle.

Mahse, India captain Virat Kohli chuan, "Mi zawng zawngin chet chhiat ṭum kan nei a, Dhoni chauh ni loin kan vaiin kan khel chhia a ni," tiin captain hlui hi a chhan.

India hian T20 series chu 2-1 in an la tawh a, ODI series khelh zawhah hian test series match nga an khel leh bawk ang.

India Squad:

Virat Kohli (Capt), Shikhar Dhawan, Rohit Sharma, KL Rahul, Shreyas Iyer, MS Dhoni (wicketkeeper), Dinesh Karthik, Yuzvendra Chahal, Kuldeep Yadav, Bhuvneshwar Kumar, Shardul Thakur, Hardik Pandya, Siddarth Kaul, Umesh Yadav, Suresh Raina, Axar Patel.