GermanGP roreltu Marquez

Marc Marquez chuan class hrang hrang chhiar zawmin a zawna a vawi kua nan German Grand Prix-ah hnehna a chang ta, Honda rider hian MotoGP season kal laiah point 165 hmuin hmahruaitu a nihna chu a sawhnghet zel.

Pathianni zana tlan German GP-ah Marquez-a'n pole position aṭanga bul ṭanin a tir lamah Jorge Lorenzo phak lo deuh mah se intlansiak a zawh meuh chuan hnehna changtu a ni leh thei tho. Spanish rider hian tun season chhunga a vawi nga nana hnehna chang turin minute 41 leh second 5.019 a mamawh, a hnungah chiah hian Valentino Rossi a thleng thung.

Kum 25 mi Marquez hian MotoGP nomawi a kawl lai humhim thei turin a dinhmun a siam ṭha leh tawh hle a, rider championhsip lamah amah hnaih bertu Rossi aiin point 46 ngawtin a sang fal tawh, intlansiak pahniha pakhatna dinhmun luah tuin a point hmuh theih zat (50 points) deuhthaw a ni tawh.

Champion lai Marquez chuan, "Tun hnaiah Yamaha leh Ducati an tlan ṭha thei em em a, kan fimkhur lehzual a ngai dawn hle. Tun ṭumah pawh Lorenzo khan bul a ṭan fuhin a tlan ṭha em em a, tlanpelh theihna tur hun ka ngaihtuah char char a ni. A nihna takah chuan warmup kan neih lai aṭang tawhin Andrea Dovizioso pawh a tlan chak hle, tha thlah a thiang dawn lo takzet a ni," tiin a sawi.

Intlansiak hmasa lam Assen-a thil thleng tawh ang bawkin Ducati rider Lorenzo-a'n bul a ṭan ṭha em em a, chutihrualin eng chen nge hma a hruai theih ang? tih chu zawhna lian tak a ni. Lap 12-na an tlan ṭan chauh tihin Lorenzo hi tlankawng sirah a tlan chhuak deuh a, hei hian a dinhmun a tih hniam phah. Lorenzo hian sea­son tharah chuan Ducati chhuahsanin Honda bike a khalh tawh dawn a, a teammate thar tur Marquez nen hian an inel chho hle tura ngaih a ni.

Honda rider Marquez-a'n championship-ah hma a hruai fal viau rualin Yamaha lam dah bo theih an la ni bik lo. Rossi hi tawnhriat nei ṭha a ni a, inelna a zawh hma chuan tha a thlah lo ang. Itlalian rider hnungah chiah hian a teammate Maverick Vinales a awm bawk, ani hian point 109 hmu tawhin - anni pathum chiah hi tun season chhunga point 100 hmu tling thei an la ni.