Futsal referee 71 an awm

Mizoram Football Association chuan July 14, Inrinni khan Lammualah Futsal Referee Clinic leh Examination an buatsaih a, exam hmachhawn 82 aṭangin 71 an pass. Heng referee pass thar chiah hian exam buatsaih leh hma chu MFA hnuaia futsal inelna an kaihruai thei ang.

MFA referee committee chairman C. Vanlalmawia'n referee nih tuma kalkhawmte hi a fuih a, secretary Lalrawngbawla'n hriattur pawimawh a sawi. AIFF match commissioner Malsawma Renthlei leh MFA futsal assistant secretary Lalbiakdika Ngente-ten an ho a, Asian Football Confederation Futsal Referee Course zo tawh Lalthangliana'n clinic leh examination hi a kalpui a ni.

MFA chuan July 19-25 inkar hian Lloyd sponsor-in Lammualah Futsal Tournament - MFA Futsal League Club, Division One Club leh Veteran (kum 40 chunglam) tan inelna a buatsaih dawn.