MFA Super Cup semifinal-ah Big Four

Lalbiakliana Memorial MFA Super Cup quarterfinal chu nimin khan khelh zawh a ni a, tualchhung football club lian pali Chhinga Veng, Mizoram Police, Aizawl FC leh Chanmari FC ten semifinal an lut.

Nimin Lammuala quarterfinal match hnih khelhah MPL club an vannei a, Mizoram Police-in Aizawl FC Academy chu 2-1 in an hneh ram a, penalty shootout-ah Chhinga Veng-in Kanan FC 5-4 in an hneh hram bawk.

Police nge nge
Mizoram Police-in recruitment an neih hnuhnun berah tualchhung footballer ṭha an la khawm a, tun inlenaah erawh an player ṭha an la chhawr thei lo. Police an ṭhat dan tur berin an la chhawr thei lo a, harsatna belhchhah turin an star striker F. Lalrinpuia an la hmang thei lo bawk.

Lalbiaksanga Colney hote hian goal hnih hma an hruai a, first half minute 37-naah Lalbiakhlua ball pet chu keeper-in tiperin Lalfakzuala'n a tauh lut. Minute 54-naah Fakzuala penalty hlawhchhuah chu Hualngohmun tlangval Lalramtharmawia'n goal-ah a chantir bawk.

Second half-ah Aizawl FC Academy goal bawh a na a, minute 87-naah David Lalhlansanga'n an siphurh sut ṭhen mah se goal dang a luh belh lo.

Beisei pha lo Chhingcows
Chhinga Vengin season liam ta khan nomawi chawi theih zawng zawng an chawi vek a, MFA Super Cup-ah champion lai an ni.

Tun ṭumah erawh Kanan FC nen an inhnehtawk a, minute 90 chhungin Chhingcows an chungnung bik lo a, hun pangngaia an inhnehtawk hi an khelh dan thlirin a awm hle.

Penalty shootout-ah erawh team ṭha zawk Chhinga Veng an vannei a, 5-4 in an chak. Semifinal-ah Chhingcows hian Mizoram Police an hmachhawn dawn a, inkhel hmuhnawm a ni ang.

Nimin Inkhel Results
Aizawl FC Academy 1 - 2 Mizoram Police FC
AFCA : David Lalhlansanga 87'
MPFC : Lalfakzuala 37'; Lalramtharmawia 54' (P)
Chhinga Veng FC 0 - 0 Kanan FC
Penalty Shootout-ah Chhinga Vengin 5-4 in hnehna an chang
July 16, Thawhṭanni
Aizawl FC 0 - 0 Ramhlun North
Penalty Shootout-ah Aizawl FC 5-4 in an chak
Chanmari FC 7 - 1 FC Zokhawthar
CFC : Laldampuia 4', 15', 65'; Lalrammuana 7'; Ramchhuanpuia 42' (OG); Lalmuanzova 55'; Samuel Laltlanthanga 90'
FCZ : Joseph LR Sailo 57'
Semifinal
July 19, Ningani
Aizawl FC 2:00 PM Chanmari FC
July 20, Zirtawpni
Mizoram Police 2:00 PM Chhinga Veng