Chelsea tana inhlan ral tur Sarri

Premier League club Chelsea manager thar Maurizio Sarri chuan a club thar tan a inhlan ral raih tur thu sawiin, "Nomawi kan chawina tur a nih chuanin ka neih zawng zawng pawh hi ka chan mai ang," a ti.

Kum 2003 khan Roman Abramovich chuan Chelsea neitu nihna a nei ṭan a, Russian sumdawng hausa tawntawin Blues a lei hnuah Sarri hi manager 'nghet' an neih vawi kuana a ni tawh.

Napoli boss hlui chuan, "Match hnih khat hnuah chuan ka duhdanin ka player-ten an khelh theih mai ka ring a, fan-ten he team hi hmuhnawm ti takin an thlir theih ka beisei.

"Chelsea hi Europe-a league langsar ber zinga club ṭha an ni a, buaina awmchhun chu England-ah chuan club lian paruk vel lai an awm hi a ni," a ti.

Antonio Conte-a'n Chelsea-ah season hnih hun a hman chhungin Premier League leh FA Cup nomawi a chawi hman a, hetichung hian Italian manager hi ban erawh a ni ta tho.

Mahse, Sarri chuan Pep Guardiola, Jurgen Klopp, Jose Mourinho leh Mauricio Pochettino-te a el theih a beisei thu sawiin, "Premier League-ah chuan khawvela coach langsar ber ber an awm a.

"Guardiola, Pochettino, Mourinho, Klopp leh manager dangte nena inel chu a nuam dawn takzet a ni. He hmunah hian Chelsea leh football tan ka rawn kal a, ka tan chuan mang ram ang mai a ni," tiin Blues a zawm thei chu a hlim thu a sawi.