Chona thar hmachhawn ngam Ronaldo

"Juventus hi Italy rama club ropui ber a ni a, khawvela a ṭha berte zinga mi a ni bawk. Coach leh president ṭha tak awmna a nih bawk avangin he hmun pan tur a thutlukna siam chu thil har a ni lo," tiin Cristiano Ronaldo chuan a club thar Juventus player a nih hnua an phochhuahna hmasa berah a sawi.

Kum 33 mi Ronaldo hian season kua a chamchilh tawh Real Madrid chhuahsanin Italian champion hi pound maktaduai 99.2 in a zawm a, Turin-ah hian season li cham turin contract a ziak. Ronaldo chuan, "Tun ang kum tawha Juve ka zawm thei hi ka lawm hle," tiin a sawi a, ani ang kum tawhah chuan player ṭhenkhatin awlsam zawka sum hlawh hnem theihna Qatar emaw China emaw an pan thu a sawi tel bawk.

Chona thar

Cristiano Ronaldo-a'n Manchester United tan Premier League leh Champions League nomawi a chawi hnuah, 2009 khan Real Madrid a zawm. Spanish club tan hian season kua a khelh chhungin goal 450 khungin club record a siam tur hian match 438 chiah a mamawh!

English club tana a hlawhtlin hnuah Ronaldo hi Spain-ah pawh a sulhnu a ṭha zual sauh. Champions League nomawi vawi li a chawi a, European club inelna lianah hian tun hnai season ruk chu goal khung hnem ber a ni thei; UCL bakah La Liga, Copa Del Rey leh Spanish Super Cup vawi hnih ṭheuh a chawi bakah UEFA Super Cup leh FIFA Club World Cup te vawi thum a chawi bawk a ni.

Ballon d'Or chawimawina vawi nga dawng tawhtu Ronaldo chuan, "Chak zel ka duh a, a ṭha ber nih ka duh bawk. Ballon d'Or ka dawng emaw, dawng lo emaw pawh a ni thei a, thil chu a nih dan tur angin a kal mai ang. Man United leh Real player nichung khan a awlsam lo a, he hmunah pawh a dang chuang kher lo ang," tiin hlawhtlina chu awlsam taka chan theih a nih loh thu a sawi.

Hmabak UCL

England leh Spain-a hlawhtlinna leh ropuina a chan hnuah Italy-ah chona thar a hmachhawn leh dawn a ni a, a club thar Juventus hi Serie A rorel mektu an ni a, a zawnin season sarih league nomawi an chawi tawh bakah Coppa Italia champion lai an ni bawk–an hmabak chu Champions League a ni dawn.

Old Lady hian 1996-a UCL nomawi an chawi hnuah final vawi nga khel leh tawh mah se a chak lo zawkah an ṭang vek. Season hmasa khan Real leh Juve te quarterfinal-ah an intawng a, Spanish club-in Ronaldo goal thum hmangin hnehna an chang–Portuguese forward hian Allianz Stadium-ah goal ropui khungin Juve fans lam pawhin an lawmpui hial!

Season thar thlirin Ronaldo chuan, "Champions League hi chu club tinin an chawi duh a ni a, keini pawhin kan tum ang. Chutih rualin UCL chauh ni loin Serie A champion ni tur pawhin kan bei dawn a ni.

"Inelna hi a hautak em em vek tih kan hria a, inthlahdah miah loin kan khelh a ngai dawn. He club hi hlawhtlinna chanpui ngei ka duh a, player pawimawh ka nih theih ngei ka beisei. An hnena khel tura min duh tih ka hriattirh aṭangin ka lawm a, Juventus hi dinhmun sang zawka hruai kai theih ngei ka duh," a ti.

Ronaldo hi kum 33 mi ni tawh mah se khelmual chhungah a la tar lo. Season hmasa khan inelna hrang hrangah club tan match 44 a khelh aṭangin goal 44 a la khung thei! An ram Portugal tan pawh player pawimawh ber a la ni phak, FIFA World Cup-ah khan Spain lakah goal thum a la khung thei a, a career-ah hattrick vawi 51 a siam tling tawh.

A tawnhriat leh sulhnu kan en chuan Ronaldo aia forward ṭha lei tur hi zawng ila an la vang khawp ang. Chutih rualin player induh tawk ve tak a nih avangin a teammate tharte nen a boruak ṭha an neih theih nan coach Massimiliano Allegri a pawimawh dawn, Bianconeri neih sa dangte nen in man taka an khel thei a nih chuan European club lian dangte tana hmachhawn châkawm lo tak an ni ang.