Real chungchangah hian lawm loh reng ka nei lo - Lopetegui

Real Madrid manager thar Julen Lopetegui chuan a club thar chu nuam a tih thu a sawi. Los Blancos hian Cristiano Ronaldo chan mah se FIFA World Cup neih zawh taka Golden Ball dawngtu Luka Modric leh France champion puitu defender Raphael Varane an kawl bawk.

Kum 51 mi Spanish manager chuan, "Real Madrid hi ka sei lenna a ni a, football kalhmang ka zirna a ni a, tun dinhmun ka thlen theih nan hian he club hian nasa takin min pui a ni," tiin a sawi. Lopetegui hian Real Madrid B team Castilla tan match 61 a khel a, first team tan erawh match khat chiah a khel thung.

Lopetegui hian manager hna a tawh hnuah Castilla bakah Spain junior team te enkawl a. Spain Under 19 leh Under 21 team chu Euro C'ship U19 (2012) leh U21 (2013) ah te a champion pui ve ve a, Portugal-ah kalin Porto enkawla a intah hriam hnuah Spain senior team enkawlin match 20-ah hneh loh a tawng lo.

Amaherawhchu, Lopetegui hian Spanish Football Federation hriatpui loh in Real Madrid nen inremna an lo siam avangin an ban a, World Cup-ah La Roja a enkawl thei ta lo.

Lopetegui chuan, "Real Madrid ngainat hi thil harsa a ni lo a, an anthem thleng mai hian ka ngaina em em vek a ni," tiin a lungawi hle.

Hmabak erawh a ko tih hriain Real boss chuan, "Khawvela club ṭha ber ka zawm tih ka hria a, beisei pawh an nei sang dawn. An duh ang tih hlawhtlin theih ka inbeisei a, UEFA Super Cup-ah Atletico Madrid nen nomawi hmasa ber kan inchuh dawn a, lak nghal kan tum ang," tiin a sawi a, tunkar chhoah player thar an lakbelh theih a beisei thu a sawi.

Real Madrid hi tun World Cup-a silver ball dawngtu Eden Hazard nen sawi zawm a ni mek a, media lamin Los Blancos nena an sawi zawm Neymar erawh Paris Saint-Germain sporting director Luis Fernandez chuan Brazil forward chu French club-ah cham a tum thu a sawi thung.