World Cup 2018: Ennawm ropui chu!

'Khawvela ennawm ropui ber' tiin FIFA World Cup chungchang sawi a ni ṭhin a, inkhel hmuhnawm leh chanchin ngaihnawm tak tak he World Cup hian hriatreng tawh turin a hnutchhiah fo ṭhin.

Kum 2018 a her chhuak a, ṭum dang zawng aia World Cup hmuhnawm, result mak, beisei loh thil tam tak a thleng ti ila thu uar lutuk kan ni lo ang–tuin nge Croatia final an luh beisei ang a, semifinal-a England an inlan ring ang?

Russia-a inelna ṭantirh a nih khan Lionel Messi leh Criatiano Ronaldo hming lamrik a ni a, inelna a tawp meuh chuan rawlthar duhawm Kylian Mbappe hming a langsar ber a, Golden Ball dawngtu chu Luka Modric a ni.

Goal tamna

Russia leh Saudi Arabia-in World Cup match hmasa ber an khel a, inelna thlengtu Russia-in goal nga ngawt an khung nghal! June 14-a neih ṭan inelnaah hian match 64 khelh a ni a, goal 169 a lut.

Goal hi chawhrualin match tina goal 2.64 zel lut ang a ni a, 1998 leh 2014-a goal 171 ve ve an khung ṭum chiah kha 1998 hnu World Cup-ah an phak lo. Kumin World Cup-ah goal khung miah lohna inkhel pakhat chiah a awm a, chu chu France leh Denmark-te group stage-a 0-0 a an inhnehtawkna inkhel kha a ni.

Player mala goal khung hnem ber chu Harry Kane niin goal ruk a khung a, team mala goal khung hnem ber chu Belgium niin Red Devils hian match sarih an khelh aṭangin goal 16 ngawt an khung a, anmahni hnaih bertu France leh Croatia-in goal 14 ve ve an khung.

A tawpah a changtupa!

Kumin World Cup-in danglamna tak a neih pakhat chu hun tawp lama goal lut a tam kha a ni–minute 90 hnua chakna goal luhna inkhel match kua ngawt a awm a, match li dangah 'draw' result hlawhchhuah nan minute 90 hnuah goal a lut bawk.

Kum 2014 World Cup-ah khan minute 90 hnua chakna goal khungna inkhel match li a awm a, hei hi minute 90 hnua chakna goal khung lama tun World Cup hnaih bertu a ni–1998-2014 World Cup zawng zawng belhkhawm pawhin tun World Cup-a minute 90 hnu lama chakna goal khung zat a phak lo.

Minute 90 hnua goal lut ni kher lo, minute 90 hma vel chiaha goal luhna inkhel hmuhnawm tak tak group stage-ah pawh a awm nghal. Chung zingah chuan Ronaldo-a'n Spain nena 3-3 a an inhnehtawkna tur leh a hattrick siamna tur ni bawk minute 88-naa a khung kha a tel reng ang.

Mangṭha Germany

World Cup ropuina chu player langsar, sum ngah leh club liana khel ho ringawtin result ṭha an nei bik kher lo a, rin loh tak rawn langsar an awm ṭhin–kumina a tihchianna ṭha ber chu Germany an ni.

Champion lai ni chunga Russia pantu team hian match thum an khelhah vawi khat chiah chak hmel an hmu a, goal hnih chiah khungin an lamah goal li a lut – German team vanduaina hmuh hmaih theih a ni lo.

Die Mannschaft hian goal khung tumin shot vawi 72 an nei a, tun inelnaah team panga chiahin anni aiin shot an ngah – heng zinga ram pali chu anni aia match li a khel tam zawk an ni!

Beisei loh Croatia

Croatia hi team ṭha tak nia sawi ni ṭhin mah se top team zingah erawh dah an ni ngai lo a, inelna ṭan a nih hma khan World Cup semifinal an luh ringtu chu an tam lo ngawt ang–mahse an lut miau si.

Luka Modric hoa khel team hian vawi 352 ngawt goal khung tumin an khingpui team an 'attack' a, vawi 301 ngawt clearance, tackle leh save an nei bawk–attacking leh defending-ah tun World Cup-a ti ṭha ber ve ve an ni a, Dejan Lovren-a'n, "Khawvela defender ṭha zingah ka tel tawh," a tih khan huai taka a ṭawngchhuah chhan a hriat.

Croatia tan tlarhnungah Dejan Lovren leh Domagoj Vida chu player langsar an ni a, Russia-a player inlan zinga km 72 tlana tlan tam ber Ivan Perisic-a'n goal thum khungin assist vawi khat a nei a, Luka Modric leh Ivan Rakitic lam hmaih an thiang lo.

Stats hrang hrang!

Belgium leh France chu tun World Cup-a chak hnem ber an ni a, match rukah an chak–match sarih an khel. England-in semifinal lut mah se tun World Cup-a chak lo hnem ber an ni!

Three Lions hi vawi thum an chak lo a, group stage-ah Belgium an hneh lo a, semifinal-ah Croatia an hneh lo a, pathumna inchuhah Belgium an hneh lo nawn bawk – Panama leh Egypt chu vawi thum tlawm an ni bawk a, group stage-a an match thum khelhah an tlawm fai vek.

Russia-a khelh zawh tak inelna hi a hmunah mi maktaduai thum (3,031,768) chuangin an en a, match tinah mi 47, 371 zelin en ang an ni. Tun World Cup-a goal lut zinga 43% chu set piece aṭanga lut a ni a, 1966 hnua set piece aṭanga goal luh hnem ber ṭum a ni.