Tennis inelna a nung thar leh ta

Novak Djokovic-a'n Wimbledon nomawi a chawi hnuah mipa tennis inelna a nung thar leh a, Serbian tlangval hian Roger Federer leh Rafael Nadal te nomawi bawm chu ka sawi nghing phak rih lo mah se boruak erawh a chhem nung chho hle.

July 15 zan khan Djokovic chuan Kevin Anderson hnehin a vawi li nan Wimbledon champion a ni a, Grand Slam nomawi a chawi tawh chu 13-ah pung chhoin, a tluk loh chu Roger Federer (20), Rafael Nadal (17) leh Pete Sampras (14) te chiah an ni tawh. Djokovic-a'n Centre Court-a hnehna hlado a chham ri hi player ropui dangte tana ngaimawh tham a tling chiang hle ang.

Djokovic a la dam!

Hliam leh mimal buaina dang vangin season hnih chhung chu tennis court chhungah Djokovic-a'n chanchin lawmawm a nei hlei thei lo a, tun season tir lama neih Australian Open leh French Open-ah pawh a thleng sang lo.

World ranking-ah pawh a tla hniam zel a, 21-naah a awm hman hial. Tun Wimbledon-ah hian seeded 12-na pek niin, buaina leh harsatna nei loa a khelh meuh chuan a hlawhtlinna tur kawng dal zo an awm lo, nomawi chawi tur hian seeded kai phak player pali a hneh.

Kum 31 mi Djokovic chuan, "A nihna takah chuan inelna kan neih ṭan hma kha chuan Grand Slam nomawi ka chawi leh theih tawh loh ka ring hman hial. Result ka nei ṭha lo chu thu hran nise ka khel ṭha lo em em a, ka lungngaiin ka mangang hman hle a ni.

"Mahse, ka beidawng duh lo a, ka kiu hliam an zai bakah pawn lam buaina leh harsatna ka neih tawhte chu zinkawng ngaihnawm min ziahtirtu an ni ta zawk a ni. Mihring ka ni a, hun harsa leh hlimawm tawn chang chu a awm tur a ni," tiin a sawi.

I kiangah chuan

Djokovic hian high school an kal lai aṭanga a hmelduh tawh Jelena Ristic chu 2014 July thla khan nupuiah a nei a, ani hian tennis a khelhna hmunah a ṭawiawm ṭhin. An inneih kum October thlaah fapa hmasa Stefan neiin, a nupui leh fapa hian Wimbledon final an khel lai hi a hmunah an en.

Jelena nen hian kum 10 chuang an inzui tawh a; Djokovic chuan, "A nuam leh a hrehawm, hun harsa leh nuam chu kan paltlang dun tawh," tiin a nupui chu atan a awm reng ṭhin thu a sawi. A nupui nen hian fapa Stefan bakah nikum khan fanu Tara an nei tawh bawk a ni.

A fapa in a inkhel a en chungchang sawiin Djokovic chuan, "Engtik niah emaw chuan Stefan hian tennis ka khel lai a la en ang tiin ka ngaihtuah ṭhin, tunah chuan hlawhtlinna ka chang lai a hmu ta. Engtik lai pawhin ka hre reng ṭhin dawn a ni," a ti.

Djokovic-a'n season hnih chhung harsatna a tawh chu a liam rih niin a lang a, chawlh kar 223 chhung zet world number 1 nihna lo hauh tawhtu hi Thawhṭanni a ranking chhuak thar berah chuan 10-na a ni leh tawh–Grand Slam paliah a champion kim thei a, ani aia upa zawk Federer leh Nadal te pahnih inel tur karah a rawn chhawr chhuak chho leh a nih pawhin a mak lo ang.

Roger leh Rafa

Wimbledon hi tennis tournament upa ber a ni a, Grand Slam pali zinga grass court-a an khelh awmchhun a ni bawk. 1877 aṭanga neih tawh Wimbledon-ah khan champion lai Roger Federer khan a title humhim leh thei tura ngaih a ni.

Mahse, Swiss star Federer khan Kevin Anderson hneh loin quarterfinal-ah vuak tlak a ni. Grand Slam vawi 20 champion tawh Federer hi kum 36 mi a ni tawh a, inelna zawng zawngah a inlan duh tawh lo–Wimbledon a khelh dawn vangin French Open pawh a khel duh lo. Mahse, a tum ram a thleng zo ta chuang lo.

King of Clay tia hming lem an pek Nadal-a'n season dang ang bawkin a inkhelh tiamna hmun clay-ah match a khel hnem a, Wimbledon inbuatsaih nan hian tournament a khel miah lo! Inelna takah erawh Nadal a khel chhe lo a, vawi thum a champion tawhna a nih avangin a mikhual lem lo.

Kum 32 mi Nadal hian a match hmasa paliah set a hloh miah lo, Juan Martin del Potro hneh tur erawhin vanneihna a mamawh tel. Djokovic nen an intawn ṭumin set hnuhnung berah break point vawi nga a hman ṭangkai theih loh avangin a chak lo zawkah a ṭan phah.

Player ropui pahnih Federer leh Nadal te hi an theihna a sang fal a, chutihrualin a vanglai erawh a liam mek. Amaherawhchu, season hmasa khan Grand Slam pali an insem thei a, tun season inelna hmasa Australian Open leh French Open pawh an ta a ni. Tunah Djokovic hmel a rawn lang ve leh chiah a, season tawp lama khelh tur US Open a ngaihnawm phah ang.