Henry-a'n team enkawl dawn?

Thierry Henry chuan Sky Sports tana pundit a nihna a bansan a, Arsenal striker hlui hian season tharah team enkawl a tum vang nia ngaih niin Belgium assistant coach a nihna pawh a bansan zui a rinawm ta hle.

Kum 40 mi Henry chuan, "Tun hnai kum li chhung khan football team enkawl turin tawnhriat ka nei hnem hle. Heng ka tawnhriatte hian tun hma aṭanga ka lo suangtuah ṭhin football manager ni thei turin min pui nasa hle.

"Sky Sports ka chhuahsan a ngai hi a pawi ka ti a, chutih rualin khelmualah hun tam zawk ka hman a ngai tawh. Chu chu ka thil tum tih hlawhtlin theihna tur kawng pawh a ni," tiin a sawi.

Henry hian Sky Sports-ah hian kum khatah pound maktaduai li a hlawh a, kum hnih leh a chanve contract a la neih avangin pound maktaduai 10 a hnawl tihna a ni. Arsenal legend hi Chelsea legend John Terry-a'n a thlak dawn tih thawm a awm.

Player a nih laiin Henry-a'n Arsenal tan inelna hrang hrangah goal 228 khungin Premier League leh FA Cup vawi hnih ve ve a chawi pui a, Barcelona a pan hnuah La Liga leh Champions League a chawi bawk. Ran tan World Cup (1998) leh Euro (2000) champion a nih theih bawk avangin player a nih lai chuan tawnhriat a nei ṭha hle.

Inkhelh a chawlhsan hnuah coaching a luhchilh a, Belgium coach Roberto Martinez thachangdawltu niin tun World Cup-ah khan Red Devils chu pathumna an nih pui. Hun puma coaching luhchilh a tum takaha chuan, khawtlang media-te chuan Henry hian coach ni tura sawmtu a ngah hle niin an tarlang leh hman der tawh a ni.