Arsene Wenger a inbun ruak

Journalist Christine Kelly-i hmaah Arsene Wenger a inbun ruak a, French nula zawhna chhangin Wenger chuan, "Hun rei tak chhung Arsenal ka enkawl kha ka hringnuna ka tihsual lian ber a ni mai thei," tiin a hmangaih Gunners lakah thutlukna a siam sual thu a sawi chhuak!

French manager hian kum 22 chhung a chamchilh tawh Arsenal chu season hmasa tawp rual khan a chhuahsan a, tunah hian hnathawh nghet nei loin a awm mek. Wenger hian chawlh a la tum lo a, chutihrualin eng hna nge a thawh dawn tih a la sawi chiang thei rih lo thung.

Tihsual chu

Arsene Wenger-a'n Arsenal a enkawl chhungin hlawhtlinna tam tak a chang a, chung zingah chuan Premier League nomawi pathum a chawi leh FA Cup pasarih a chawi chu a lian leh langsar an ni. 2003-04 phei kha chuan hneh loh nei loin league nomawi an chawi a, he a record hi midangin an tih theih ngai loh thil a ni - tluk leh tur pawhin a awlsam lo hle ang tih a chiang.

Mahse, Wenger hian a hun hnuhnung lamah beisei ang result a nei thei lo. 2004 hnu lamah league nomawi a chawi leh lo a, a season hnuhnung pahnihah phei chuan a sang pali zingah an tel phak lo a, a kum zawnin Champions League an khel thei lo hial a ni.

Christine Kelly-i'n hringnuna a tihsual lian ber a zawhna chhangin Wenger chuan, "Club ngaia kum 22 chhung ka awm kha a ni mai thei. A nihna takah chuan kei hi insawn kual reng duh mi ka ni a, chutihrualin chona hmachawn duh mi ka ni tel bawk. Mahse, chona ka hmachhawnah khan saltang ang mai ka ni hman," tiin Gunners a enkawl rei chu a tihsual a nih thu a sawi.

Premier League club ṭha zinga an tel reng theih nan an theihna zawng zawng a hman thu sawi zuiin Wenger chuan, "Arsenal tan engkim ka hlan a, ka kianga mite ka tih lungngaih phah fo. Mi ṭhenkhat ka hlamchhiah a, ka chhungkua ngei pawh ka ngaihtuah hman lo. Ka laina hnai tak takte tan pawh hun leh hmun ka nei thei lo ṭhin a ni," a ti.

Wenger hi basketball player hlui Annie Brosterhous nen an innnei a, 1997 khan fanu Lea an nei. Mahse, Wenger leh a nupui hi 2015 khan an inṭhen, an inṭhen chhan lian tak pakhat chu football a ngaihtuah nasa lutuk a, politics a ngaihven bawk avangin chhungkaw tan hun a nei lo, tia sawi ṭhin a ni.

Zawhna chhan chhunzawmin Wenger chuan, "Zep thu a cheng lo a, mahni hma­sial tak ka nih chang pawh a awm ang. Mi pakhatin a hmangaih em em tan a theihna zawng zawng a hlan ṭhin a, midang a ngaihthah phah ta ṭhin a ni," tiin Arsenal ni lo chu thil dang ngaihtuah a neih theih ṭhin loh thu a sawi.

Hmanah chuan...

Kum 68 mi Arsene Wenger hian French chhim chhak lama thingtlang khaw pakhat Strasbourg daia thingpui dawr pakhat chu a football nun bul ṭanna pakhat a nih thu a sawi. Strasbourg hi Arsenal manager ropui Wenger pianna hmun a ni a, Alphonse leh Louise Wenger te fa pathum zinga a naupang ber a ni.

Wenger chuan, "Tualchhung football team pakhat chuan thingpui dawr chu hmunpui atan an hmang a, football leh sakhua bak thil hriat tur dang a awm lo. Zing aṭangin sakhua kan sawi a, a hnu lamah erawh chuan football vek a ni tawh mai.

"Kum nga mi vel chauh la ni mah ila team enkawl tute thu leh hla ka ngaithla kar zel a, naupangte la ni mah ila an team kha ṭha tak an ni lo tih ka hre thei a, Pathian puihna an mamawh hle tih ka hre bawk. An inkhel ka en a, goal khung turin centre forward ṭha tak an mawmawh tih ka hre thei bawk," tiin kum 10 a tlin hmain football team kalphung leh enkawl dan a hriat ṭan der tawh thu a sawi.

Wenger hi player a nih laiin RC Stras­bourg Alsace tan a khel a, mahse player a ni rei lo. Kum 33 mi chauh a nih laiin French club Nancy a enkawl ṭan a, chumi hnuah AS Monaco enkawl lehin Japanese club Nagoya Grampus Eight manager a nih laiin Arsenal enkawl tura lak a ni.

Manager a nih ṭan dan sawiin Wenger chuan, "Player ka nih laiin sulhnu ṭha leh ropui ka nei lo a, ka khelhpuite entawn leh chung en ka nih lem loh avangin manager ni tur hian ka tling tawkah ka ngai lem lo. Mahse, mi ṭhenkhat chuan keimah a thil awm kei man ka hmuh loh chu an hmu tlat si a ni.

"Manager hna thawk thei turah min ngai a, ka luhchilh ta reng bawk. A tirah chuan kei aia upa player ṭhenkhat ka enkawl a ngai a, thil mak danglam tak erawh thuneihna inchuh boruak a awm ngai lo, thinrim engphiara inhnial ang chi pawh ka tawng lem lo," a ti.

Arsenal chu

English club a enkawl hnuah Arsene Wenger-a'n player tam tak a lei a, a lak hnuhnung ber chu Pierre-Emerick Aubameyang niin, pound maktaduai 56 man Gabonese striker hi a player lei zinga manto ber a ni.

Player a lakluh zinga ṭha a tih pali an zawhna chhangin sum ren em em mai Wenger chuan, "Toure, Henry, Campbell leh Anelka te kha an ni. Player manto hi ka ngaisang lo a ni bik lo a, mahse man tlawmte nichunga player ropui taka rawn chhuak tate hi kei chuan ka dah sang a ni," tiin a sawi.

Arsene hian a siam len Thierry Henry leh Patrick Vieira te a dah sang hle a, player an nih laia ropuina an chan tawh bakah manager ṭha tak an nih theih a rin thu a sawi. Wenger chuan, "Theihna an nei, an fingin football an hrechiang hle. Chutihrualin hlawhtling tur chuan inpumpek a ngai tih hriat a ngai.

"A chang chuan zing dar thumah te hian team thlan chungchang te, tactic hman tur leh player rem dan tur te hi ngaihtuah a ngaih chang a awm," tiin manager hlawhtling ni tur chuan mut mu tuah mang loa hun hman a ngaih chang a awm tih sawi.

Duhthusam

Arsene Wenger hian a sawi tawh angin a naupan lai aṭangin football bakah politics a ngaihven a, French President ni ta la eng dan nge i siam ang? tih zawhna chhangin Wenger chuan, "Football hi naupang ten an duh ang anga an khelh vek tur a ni ka ti ang a, French ram chhunga khawi hmunah pawh school hrang hrangah khelh tur a ni," a ti.

Mihring tin hian mahni duh ang thlapa nun hmang kan awm bik lo a, kan duh leh duhthusam zawng zawng pawh a thleng dik vek kher lo. Midang ang bawkin Arsene hian a hun tawn tawh zingah thaibo theih ni se chuan thabo daih chak a nei ve tho.

"Kan chak loh tawhna zawng zawng kha nawhreh daih ka duh," tiin player a nih lai leh manager a nih hnuah team dang an hneh loh tawhna zawng zawng chu koh kira thaibo daih theih nise a duh thu a sawi tel bawk.