Serena leh Kerber-i'n hma an sawn

Hmeichhe tennis thuneitu sang ber Women's Tennis Association chuan Thawhṭan zan khan world ranking thar an tichhuak a, Wimbledon final khel pahnih Serena Williams leh Angelique Kerber ten hma an sawn nasa hle.

Grand Slam vawi 23 cham­pion tawh Serena chu Wimbledon khelh hma khan world number 181-na a ni a, final a thlen avangin player 153 ngawt tlan pelin 28-na a ni dawrh. Tun season chhunga Grand Slam hnuhnung ber tur US Open inbuatsaihna a neih ṭhat a, an ramah a che ṭha zui a nih chuan a sang 10 zinga awmin kum tawp hun a hmang thei ang.

2016 Wimbledon final-a a ngam loh lakah Kerber-i'n hnehna chang letin nomawi a chawi a, German nula hian Grand Slam title pathum a kawl khawm ta. World number 1 dinhmun pawh lo chelh tawh Kerber hian player paruk lehpein palina a ni ve leh tawh bawk. Inelna lian khelh hmabak US Open hi 2016-a a hlawhtlin tawhna a nih vangin season chawhnu lamah a tan hun ṭha a inherchhuakah a ngaih theih.

Hmeichhe ranking-ah hian a chung bera awm Simana Halep chu Wimbledon-ah thleng sang lo mah se, point 7271 hmuin a la sang fal hle. Romanian nula hnung chiahah hian point 6740 hmutu Caroline Wozniackia awm chhunzawm bawk.