Mizo nula huaisente an vanduai

Hero Women's National Football Championships-ah Mizoramin 2006 champion Railways chu penalty hial thlenpui mah se a vanduai zawkah an ṭang. Mizo nula huaisente zin kawng ngaihnawm chu semifinal-ah a tawp.

EMS Corporation Stadium-ah Railways-in Mamta hmangin minute 69-naah hma an hruai a, injury time-ah Bukpui nula Miriam Lalnunsiami hmangin si phurh an sut. Extra time-ah goal a lut lo a, penalty shootout-ah Railways 6-5 in an vannei ta zawk.

Nimin tlai khan semifinal hnuhnung zawkah Manipur leh Odisha te hun pangngaiah 1-1 in an inhnehtawk a, penalty shootout-ah Hmarchhak state hi 3-0 a chakin final an lut. Tun ṭum hi hmeichhe inelna vawi 26 neihna a ni a, Manipur hi vawi 20 tehmeuh an champion tawh avangin an record a ṭha fal hle.

Game mawi
Mizo nulaten anmahni aia lian zawk Railways lakah game mawi an pho chhuak a, passing game mawi leh inkhel nung ṭha tak an pho chhuak.

Midfield laiah Bilkhawthlir nula Lalthansangi leh India international Grace Lalrampari-te hmangin inkhel thununtu zawk an ni a; Grace-i thiam piah lamah Thansangi thluak hi hmuhnawm a tling.

Railways tlarhnunga awm Suprava leh Supriya-te an khawng ṭha a, Mizoramin chance an insiam thei meuh lo. Minute 36-naah Grace-i'n box pawn aṭanga freekick petin crossbar a per a, hemi per hi Thansangi'n goal-ah pet lut mah se offside vangin pawm a ni lo.

Railways an fei
Railways hi chu state team an ni lo a, player ṭha sulhnu nei tawh awm khawm a nih avangin an ṭha rual. Chutih rualin Mizoram tan Miriam-i'n chance ṭha a nei a, goalline aṭangin Railways defender-in a pet chhuak.

Railways pawhin chance ṭha bik an nei a, player pahnihin Mizo keeper Lalhruaizeli Khiangte chauh an hmachhawn. ITI Veng nula Nupuii'n Railways player Mamta goal khung tur a dansak.

Mamta hian chance ṭha dang a hlah a, minute 70-naah a tisual tawh lo. Railways forward hian tun inelna bikah goal riat a khung tawh a, player ṭha bik a nihzia a pholang.

Goal chhuah hnuah Mizoram an dul a, Railways an chak mai turah a ngaih theih hman a; amaherawhchu hun tawp hma hretin Mizoram tha pui an rawn thawh leh a, injury time-ah Elizabeth-i ball vawrh luh chu Railways keeper Swarnamayee Samal-i'n a man thei lo a, Mizoram goal khung khawl Miriam-i'n a khung a, hun a tawp zui nghal.

Vanduai ṭum
Extra time-ah goal a luh belh lo a, Kerala khaw luma inkhel an nih avangin player inhliam leh zawn chhuah ngai an awm. Chung zingah chuan Mizoram innghahna Grace-i pawh a tel.

Penalty shootout hmanga chak zawk zawn a ngai a, huaisen takin Grace-i rawn pen chhuak mah se Railways keeper-in a dansak. Mizoram beiseina siam turin keeper Nupuii'n Railways tana pet hnuhnun ber Suprava Samal a dan sak ve thung.

Sudden death vawi hnihnaah Vanlal-hmangaihzuali a rawn lang a, Champhai nulain a pet goal ta lo. Railways tana pettu Nandini Munda-i'n chakna goal a khung a, Mizoram beisei a tawp.

Hmachhawp
Hri leng vangin MFA-in kum hnih dawn inkhel a buatsaih tawh lo a, 2019 December-a MPL final hnuah football pet a ni leh tawh lo.

Mizo nulate hian kum hnih chuang competitive football khel lo chungin he inelna hi an hmachhawn a, goal 12 thunin goal li an chhuah a, semi final-ah an vanduai.

Hri lengin a tihbuai loh chuan MFA hian tun season-ah MFA Women's League buatsaih tumin ruahmanna a siam tawh a, Inter District Women's Football Championship chu Hnahthialah nghah a ni bawk ang.

Railways chu team ṭha an ni a, team ṭha tak in din sa an nihna a lang. Chutih rual chuan kan naute’n theih tawp an chhuah a kan lawm hle. Full strength a kan khel thei lo kha kan tuar ve deuh a ni. Mizoramin bung thar kan kai a, hmeichhe league pangngai tak te hi kal pui ve thei ila hma kan sawn zual ngei ang. Zoram mipuite min lo ṭan a, duhsakna min hlan tu zawng zawngte chungah lawmthu kan sawi e. -Lalrindika Ralte,
Mizoram assistant coach