Allianz Arena-ah Barca tan chak a ngai

Zanin dar 1:30 hian Allianz Arena-ah Bayern Munich-in Barcelona an mikhual dawn. Xavi kaihhruai Catalan club hian Champions League last 16 lut turin Bayern Munich an hneh a ṭul a, German champion lakah hian ṭum hnih an mualpho tawh avangin a harsa ang.

Group E inkhel dangah Benfica-in an mualah Dinamo Kiev an mikhual dawn. Portuguese club hi point an hloh chuan Barcelona hi chak lo mah se an tling dawn a, hemi a nih avang hian Estádio da Luz-a inkhel hi ngaihthah a thiang lo.

Lewy tan
Bayern leh Barcelona a nih tawh chuan a 'te' thei tawh lo a, a ngaihnawm nghal. Tun ṭuma an inkhel tur hi group stage ni mah se a boruak a 'hot' ṭha hle. Barca tan group stage paltlang turin chak a ngai a, Bayern lamin an player chhuanvawr Robert Lewandowski-a'n Ballon d'Or a dawn loh avangin Lionel Messi khelhna ṭhin Catalan club lakah an thinrimna hrikthlak an tum thung.

Bayern ti Bayern-tu Thomas Muller chuan, "Bavarian, Polish leh German thlirna aṭang chuan Ballon d'Or award sem dan a lungawi thlak loh. A ṭhen tan chuan a thinur thlak hial ang. Kei erawh thil awm dan ka hriat chian em tawh avangin mak ka ti lo, kum 2013 khan Franck Ribery-a'n a dawng tawh lo.

"Bundesliga-ah hian player ṭha an awm a, thup theih a ni lo. Chutihrualin khawvel puma hriat hlawh lehzual tur chuan hlawhtlinna ṭhahnem zawk kan neih a ṭul a, Munich-ah Champions League nomawi kan hawn leh a ṭul. Kan hmaa awm hmasa ber tur chu Barcelona an ni a, kan theihna kan lantir ang," tiin group stage an tling chiang tawh chungin zahngaihna lantir an tum loh thu a sawi.

Bayern hian an match hnuhnung berah an hmelma Borussia Dortmund 3-2 in an hneh a, Polish striker Lewy-a'n goal hnih a khung. Kum 33 mi Lewandowski hian ṭum dang zawng aiin goal khung a châk a rinawm.

Chutihrualin Bayern hian quarantine vangin an player pawimawh Joshua Kimmich an la chhawr thei dawn lo.

Xavi 'Barca'
Barcelona-in Champions League-a an dinhmun a chhiat tawh hnuah Xavi an lalut a, hmabak a harsa dawn. Catalan club hian Nou Camp-ah Bayern hi September thla khan 3-0 in an hneh lo a, kum 2020 khan quarterfinal-ah 8-2 in an mualpho bawk.

Xavi-a'n Barca manager hna a chelh hnuah hmasawnna a awm a, chutihrualin an match hnuhnung berah Real Betis 1-0 in an hneh loh avangin German champion hneh tur chuan insiamṭhat an mamawh hle.

Barcelona tan point thum hlawh chhuak turin Memphis Depay a pawimawh dawn a, tawnhriat nei zawk Ousmane Dembele, Frenkie de Jong, Sergio Busquets, Gerard Pique leh Andre Ter Stegen te mawhphurhna a lian dawn.

Kum 27 mi Depay chuan, "Kan tan chuan final ang a ni. Kan rilru pawh a inpeih a, result nei turin kan theihna zawng zawng kan chhuah ang. Kan khelh dan chu coach thutlukna a ni dawn. Chutihrualin ball chan tam a, kan khingpuite pressure pek a, inkhel thunun kan duh ang," tiin a sawi.

Barcelona-in Allianz Arena-ah Bayern lakah inkhel thunun an tum dawn a, en a châkawm hle. Chutihrualin Barca hi Benfica-ah an innghat. Hriat tel tur chu Ukranian club Dyanmo hian an mualah goal awm loin Benfica nen an inhnehtawk tawh a, Estádio da Luz-ah hian Catalan club tan chanchinṭha thlen thei lo tawp chu an ni lo.

Tlin theih dan
- Bayern Munich : Hmahruaitu an ni chiang tawh.
- Barcelona : Bayern an hneh emaw Benfica an chak zawh loh emaw pawhin an lut bawk.
- Benfica : Dynamo an hneh a, Barcelona an chak zawh loin.
- Dynamo : Table mawngphahah an awm chiang tawh.